«Մեր նվերի շնորհիվ ԿԳՄՍ նախարարը գուցե ավելի մո՞տ կանգնի եկեղեցուն»․ ինչ են պատրաստել դիմորդները նրա համար

Հասարակություն 28 Հուլիս, 2020 13:07

Բուհեր չընդունված դիմորդները և նրանց ծնողները կրկին բողոքի ակցիա են իրականացնում ԿԳՄՍ նախարարության դիմաց:

Ըստ դիմորդի ծնող Մասիս Բաբալյանի՝ 4 դիմորդներ նվեր են պատրաստել Արայիկ Հարությունյանի համար և խնդրում են նվերը փոխանցել հասցեատիրոջը: Այսօրվա ակցիայի նպատակը նշված նվերը հանձնելն է, որից հետո ակցիայի մասնակիցները կդադարեցնեն այն: ԿԳՄՍ նախարարի խորհրդական Գոհար Մամիկոնյանը վերցրեց նվերը՝ նախարարին հանձնելու նպատակով:

Դիմորդ Հայկ Բաբալյանը ասաց, որ իրենց նվերը Աստվածաշունչն է. «Աստվածաշունչը նվիրե՛ք նախարարին 2020 թվականի այն դիմորդների կողմից, որոնք բավարար գնահատական են հավաքել, բայց չեն ընդունվել համալսարան: Մեծ հույս ենք հայտնում, որ նախարարը, ընդունելով այս նվերը, գուցե սկսի ավելի մարդկային ձևով վերաբերվել իր ստանձնած պաշտոնին, ավելի ազգանվեր գործողություն վարել, և ավելի մոտ կանգնել եկեղեցուն: ԿԳՄՍՆ քայլը ես համարում եմ, նույնիսկ չեմ ուզում ասել, թե ինչ: Նախարարը զբաղեցրել է այդ պաշտոնը, և պետք է գիտակցի՝ պետք է կատարի ազգանվեր գործունեություն»,- ասաց դիմորդը՝ ԿԳՄՍՆ խորհրդականին:

Ըստ Մասիս Բաբալյանի՝ իրենց պահանջների մեջ չկա որևէ քաղաքական աստառ. «Եթե որևիցե ոլորտի ղեկավար, որևիցե մարդ իր հայացքներում, իր որոշումներում լիարժեք վստահ է, որ ճիշտ է՝ երբեք շահարկումների հետևից չի ընկնի: Մենք երկու անգամ պահանջել ենք հանդիպում Արայիկ Հարությունյանի հետ և երկու անգամ մերժվել, որովհետև ինքը չի կարող մեր ներկայությամբ ասել այն, ինչը ասում է ֆեյսբուքյան ուղիղ եթերներում: Ես ամեն անգամ հերքում եմ, որ մեր պահանջների մեջ չկա որևէ քաղաքական ուղղվածություն: Մեր պահանջը մեկն է՝ մեր երեխաների սովորելու իրավունքը»,- նշեց ծնողը:

Մեկ այլ դիմորդի ծնող՝ Խաչատուր Նազարեթյանն էլ նշեց, որ ինքը ՔՊ կուսակցության անդամ է և ակցիայի սկզբից դիմորդների կողքին է եղել. «Ես ինքս իշխանության կուսակցությունից եմ, երբեք ոչ մի վատ բան իշխանությունների հասցեին չեմ հնչեցրել, չեմ էլ պատրաստվում: Մեր պայքարը երեխաների համար է»,- ասաց նա:

Արփինե Հակոբյան