Նույնիսկ ստեղի ժողովուրդը չգիտի՝ ոնց ապրի, մենք մեր ընտանիքներին կանչենք, ո՞նց պահենք. ՌԴ մեկնել ցանակացողները կրկին կառավարության շենքի դիմաց են
ՀասարակությունԿառավարության շենքի դիմաց Ռուսաստան մեկնող քաղաքացիները իրենց հերթական բողոքի ակցիան են իրականացնում: Նրանց պահանջը նույնն է՝ որքան հնարավոր է շուտ հասնել իրենց ընտանիքներին և աշխատանքին: Կառավարության շենքի դիմաց հավաքվել են ոչ միայն Հայաստանի քաղաքացիություն ունեցողները, որոնք ցանկանում են մեկնել Ռուսաստան, այլև Ռուսաստանի դաշնության քաղաքացիություն ունեցողները:
«Արդեն քանի անգամ ա՝ եկել ենք կառավարության շենքի դիմաց ու նույն բողոքն ենք ներկայացնում, բայց որևէ լուծում մեր խնդրին առայսօր չի տրվել: Մեզնից մեկն, անգամ, առաջարկել էր, որ որևէ ուղեկցորդ մեզ տրամադրեին, ու մեր մեքենաներով Վրաստանի միջոցով գնայինք Ռուսաստան: Մեզ խոստացան, որ էդ տարբերակը կքննարկեն, բայց դեռ ոչ մի քննարկում չի եղել: Ես քանի ամիսների ընթացքում ինչ Հայաստանում եմ, ինձ չեմ կարողացել գործ գտնել ու աշխատել, ստեղ մենակ կարաս տաքսիստ լինես, էն էլ տաքսիստներն էլ են սոված հիմա»,- նշեց Ռուսաստանի քաղաքացիություն ունեցող ցուցարարը:
Լրագրողի այն հարցին, թե արդյոք որևէ աջակցություն չեն ստացել Ռուսաստանի կողմից, բողոքի ակցիա իրականացնողը պատասխանեց. «Ռուսական կողմը, նույնիսկ չի ուզում մեզ հետ խոսա, անձամբ ես դեսպանատուն եմ դիմել, ասում ա, իսկ ինչի՞ էիք գնացել Հայաստան: Սեպտեմբերի1-ից էլ Ռուսաստանի դպրոցներից մեկում աշխատանքի եմ, չգիտեմ՝ ինչ եմ անելու: Եթե արտգործնախարարը բոլորիս ներկայությամբ, ասում ա, որ տեղյակ չի Ռուսաստանի քաղաքականությունից, ի՞նչ հարց տաս իրան էլ»,- ասաց բողոքի ակցիա իրականացնող մեկ այլ մասնակից:
«Նույնիսկ ստեղի ժողովուրդը չգիտի՝ ոնց ապրի, մենք ստեղ կանչենք մեր ընտանիքներին, որ ի՞նչ լինի, ո՞նց պահենք: Ավելի հեշտ չի լինի՞, որ սահմանը բացեն, մենք էլ գնանք մեր նպատակներին հասնենք»,- ասաց ցուցարարը: