Խնդրում եմ չտարածել ապատեղեկատվություն․ ԿԳՄՍ փոխնախարարը՝ պատգամավորին

Բլոգոսֆերա 27 Օգոստոս, 2020 0:03

«Լուսավոր Հայաստան» խմբակցության պատգամավոր Աննա Կոստանյանն իր ֆեյսբուքյան էջում գրել է․

«Եթե երեխաները դպրոցում թերթիկների վրա են կատարելու գրավոր առաջադրանքները (ըստ ԿԳՄՍ ուղեցույցի), որոնք հետո ուսուցիչը պիտի հավաքի, ստուգի ու հետ չվերադարձնի, ապա ինչպե՞ս են երեխաները ծանոթանելու և վերլուծելու իրենց սխալները։ Հիշեցնեմ, որ մեկ դասաժամը սահմանված է 20 րոպե տևողությամբ, որը բավարար չէ ո'չ դասն ստուգելու, ոչ գրավոր առաջադրանքի, ո'չ նոր դասը բացատրելու, և ո'չ էլ հատկապես 20 աշակերտի գրավոր աշխատանքների սխալները վերլուծելու համար։
Հ.Գ. փաստորեն, ըստ թարմացված ուղեցույցի` մեկ դասաժամն, այնուամենայնիվ, լինելու է 45 րոպե տևողությամբ»։

Պատգամավորի գրառմանը պատասխանել է ԿԳՄՍ փոխնախարար Ժաննա Անդրեասյանը․ «Հարգելի տիկին Կոստանյան, խնդրում եմ որպես պատգամավոր, եզրահանգումներ իրականացնել ստուգված տեղեկատվության հիման վրա և չտարածել ապատեղեկատվություն, 20 րոպեանոց դասեր չկան, դասերը 45 րոպե են, այդ մասին նշված է ուղեցույցում, այսօր մամուլի ասուլիսի ժամանակ հստակ հայտարարել եմ այդ մասին, ուղեցույցը հստակ սահմանում է՝ ինչպես են երեխաները ծանոթանալու գրավոր աշխատանքներին, և փաստաթուղթը հասանելի է նախարարության կայքում օգոստոսի քսանից: Խնդրում եմ առնվազն ծանոթանալ այն փաստաթղթին, որի մասով եզրահանգումներ են արվում և չտարածել ապատեղեկատվություն»։