Բոլորը ասում են՝ մեզ զենք տվեք, մենք պատրաստ ենք կռվելու. ինչու է աշխարհազոր ստեղծվում

Զինված ուժերից բացի, Հայաստանի իշխանությունները նախատեսում են նաև աշխարհազոր ստեղծել՝ մինչև 100 հազար աշխարհազորայինով։ Դա է պատճառը, որ Պաշտպանության նախարարությունն առաջարկում է «Պաշտպանության մասին» ՀՀ օրենքում լրացումներ կատարել. նախագիծն արդեն դրվել է հանրային քննարկման։

«Արաբո» ջոկատի հրամանատար Մանվել Եղիազարյանի ԼՈՒՐԵՐ.com-ի հետ զրույցում ասաց, որ աշխարհազորը չի թուլացնի ԵԿՄ-ի դերը․ «Համավարակով պայմանավորված՝ ԵԿՄ-ն, կարելի է ասել, լայն գործողություն չի ծավալում, սակայն ԵԿՄ-ն առանձին կառույց է, հասարակական կազմակերպություն՝ իր առանձին իրավունքներով։ Աշխարհազորը լրիվ ուրիշ մեխանիզմ է․ ուզում են  հավաքագրել 100-150 հազար մարդ։ ԵԿՄ-ն ու աշխարհազորը առանձին մարմիններ են և մեկը մյուսին չի կարող խանգարել»։

Եղիազարյանը նշում է՝ ԵԿՄ-ի և աշխարհազորի տարբերությունն այն է, որ աշխարհազորը անմիջապես բանակի հետ է համագործակցելու, պատերազմի ժամանակ դառնալու է բանակի պահեստազոր, իսկ խաղաղ ժամանակ՝ ոչ։

«Մենք պարտավոր էինք 2 աշխարհազորային կորպուս ստեղծել դեռևս 7-8 տարի առաջ, իհարկե, պետք է ունենանք աշխարհազոր։ Հակառակորդը անկանխատեսելի է, այդքան զորք է առաջ քաշում, մեկ էլ տեսաք՝ հարձակվեցին․ ո՞վ է երաշխավորելու, որ չեն խախտելու անդորրը, ամեն դեպքում, մենք պետք է կռվենք, որ մեզ օգնեն։ Բնական է՝ մեր բանակը մարտական մեծ գործողությունների համար չի բավականացնի»,- նկատեց հրամանատարը։

Եղիազարյանն ընդգծում է ՝ աշխարհազորայինները պատերազմի ժամանակ ունենալու են զինծառայողի կարգավիճակ և չեն վճարվելու։

«Աշխարհազորում ներառվելու են զինվորականներ, բանակում ծառայած սպաներ։ Կամավորներ միշտ եղել են և հիմա էլ կան, երբ արդեն սկսենք հավաքագրել ցանկացողներին, ավելի հստակ թիվ կարող ենք նշել։ Բոլորը ասում են՝ մեզ զենք տվեք, մենք պատրաստ ենք կռվելու։ Պետք է նաև որոշել, թե որտեղ են պահվելու զենքերը, բայց դետալներ կան, որոնք դեռ չենք քննարկել և չեմ կարող սպառիչ պատասխան տալ»,- ասաց Եղիազարյանը։

Անդրադառնալով ՊՆ նախարար Գաբրիել Բալայանի հայտարարությանը այն մասին, թե կամավորների անկանոն խմբերն ավելի շատ խանգարում են ԶՈՒ աշխատանքին, քան օգնում, Եղիազարյանն ասաց․ «Եթե կենտրոնացված և կազմակերպված չլինի՝ շատ հնարավոր է՝ խանգարեն։ Պետք է ճիշտ ու հստակ կազմակերպվի, որովհետև պատերազմում ամեն ինչ կարող է լինել, անգամ կանոնավոր զորքերն են մեկը մյուսին խանգարում»։

«Ըստ կանոնակարգի՝ աշխարհազորը ներկայացնում է ռեզերվային քայլեր, համարվում է կամավոր միավորում, ստեղծվելու են կորպուսներ, որոնք պատերազմի ժամանակ պետք է անմիջապես համագործակցեն բանակի շտաբի հետ, իսկ ԵԿՄ-ն հասարակական կառույց է, կիրառվում է պահանջարկ ունենալու դեպքում»,- ընդգծեց ջոկատի հրամանատարը։

Նշենք, որ աշխարհազորին կամավոր սկբունքով կարող են անդամակցել մինչև 70 տարեկան քաղաքացիները։ Նախատեսվում է՝ աշխարհազորի ընդհանուր ղեկավարումն իրականացնելու է Հայաստանի զինված ուժերի գլխավոր շտաբի պետը՝ աշխարհազորային շտաբի միջոցով: Աշխարհազորին կարող են անդամակցել նաև կանայք, սակայն նրանք առաջին փուլում մարտական գործողություններին չեն մասնակցի։

Արփինե Հակոբյան 

Այս թեմայով Քաղաքացիական պատերազմ են հրահրում․ արշավ Եկեղեցու և Կիրանցում ակցիայի մասնակիցների դեմ Բանակցողը պետք է փոխվի, հակառակ դեպքում սա պատերազմ է ժողովրդի դեմ, Ալիևն իր մարդուն է նշանակել Փաշինյանը Ալիևի դեսպանի կարգավիճակով սպառնում է հայ ժողովրդին, եթե չանենք կլինի պատերազմ. Սուրենյանց Սա պատերազմ է մեր ինքնության դեմ, ոչ թե ուղղակի տարածքի խնդիր, մեզ ծնկի չեն բերելու. Արսեն Գրիգորյան (տեսանյութ) Իսրայելը հայտարարել է, որ պատերազմ չի ցանկանում Իրանի և Լիբանանի հետ, բայց հարձակման դեպքում պատրաստ է դրան Եթե պատերազմ լինի, այդ պատերազմը բերելու է Նիկոլ Փաշինյանը. Սաղաթելյան 2023 թ. սպորտում կամավոր ատեստավորում անցկացվել է 4 մասնագիտությամբ․ Գիլոյան Թաիլանդում «պատերազմ» է սկսվել կապիկների խմբերի միջև (տեսանյութ) Պատերազմում կյանքեր փրկած կին հրամանատարը․ ՀՀ ՊՆ–ն տեսանյութ է հրապարակել Մեկնարկել է բարձրագույն կրթություն չունեցող մասնագետների արտահերթ կամավոր ատեստավորումը