Հետհեղափոխական Հայաստանի ամենաաղմկոտ հրաժարականներն և դրանց պատճառները

Հայաստանում տեղի ունեցած հեղափոխությունից ընդամենը մեկ տարի անց սկսեցին ռեզոնանսային հրաժարականներ, որոնց կենտրոնում բարձրաստիճան պաշտոնյաներ էին: Հեղափոխական թիմի ներկայացուցիչները տարբեր պատճառներով սկսեցին լքել իշխանական նավը, սակայն պատճառներից գլխավորն անհամաձայնությունն էր այս կամ այն ոլորտում տարվող քաղաքական գծի հետ: 

Ամենաաղմկոտ հրաժարաններից մեկը  Կենտրոն վարչական շրջանի ղեկավար Վիկտոր Մնացականյանինն էր: Վերջինս որքան էլ փորձեց իր հեռանալուն ապաքաղաքական քող տալ` ակնհայտ էր, որ Մնացականյանը պարզապես չի կարողանում շարունակել աշխատանքը քաղաքապետ Հայկ Մարությանի հետ: Մամուլում գրվեց և կողմերն էլ փաստացի չհերքեցին, որ այդ հրաժարականի բուն պատճառը թաղապետի անհամաձայնությունն էր՝ քաղաքապետի կողմից տարվող քաղաքականությանը: Կոնֆլիկտը հասել է կուլիմինացիային, երբ Հայկ Մարությանը վարչական շրջանի ղեկավարին հրահանգել է ապամոնտաժել տասնյակ շինություններ և ներկայացնել դրանց ցանկը, ինչպես նաև կարգադրել է աշխատանքից ազատել թաղապետարանի իրեն ոչ հաճո աշխատակիցներից ոմանց , ինչը Վիկտոր Մնացականյանը չի կատարել: 

Հայկ Մարությանի հետ սկզբունքային անհամաձայնության պատճառով աշխատանքից ազատման դիմում է ներկայացրել նաև փոխքաղաքապետ Հայկ Սարգսյանը: Պատճառը նույնն էր՝ Մարությանի հետ աշխատելու ցանկության բացակայությունը: Սարգսյանը, ի դեպ, համարվում էր հեղափոխական թիմի առանցքային անդամներից մեկը: 

Քաղաքական անհամաձայնության պատճառով հրաժարականի դիմում էր ներկայացրել Կադաստրի Կոմիտեի նախագահ Սարհատ Պետրոսյանը: Իր այդ քայլը Պետրոսյանը բացատրել էր նրանով, որ չի կիսում կառավարության քաղաքականությունն ու առկա մոտեցումները քաղաքաշինության բնագավառում, որը ներառում է նաև կադաստրի ոլորտը։ Պետրոսյանը ուղիղ մատնանշել էր երկու պաշտոնյաների՝ քաղշինկոմիտեի ղեկավար Վերմիշյանին և նախկին ղեկավար, ներկայումս փոխվարչապետ Ավինյանի խորհրդական Էլոյանին` նրանց մեղադրելով թայֆայականության մեջ: 

ՊԵԿ նախագահ Դավիթ Անանյանի հրաժարականի մասին նույնպես բազմաթիվ հրապարակումներ եղան։ Անշուշտ, այն հասունացած էր եւ մի քանի պատճառներ ուներ, բայց դիմում գրելու առիթն Արարատյան մաքսատուն-վարչության թեման էր։ Հիշեցնենք․ Նիկոլ Փաշինյանին էր ուղարկվել լուսանկար, որում երեւում են մաքսատան տարածքում մարդկանց կուտակումներ, եւ նա պահանջել էր աշխատանքից ազատել մաքսատան պետին, ինչին ընդդիմացել էր ՊԵԿ նախագահը եւ նախընտրել դիմում գրել, քան ազատել փորձառու կադրին։

 Ինչպես գիտենք , հեղափոխությունից մեկ տարի անց հրաժարական էր ներկայացրել նաև Վարչապետի աշխատակազմի գործերի նախկին կառավարիչ Գևորգ Աճեմյանը, ով այնուհետև մանրամասնել է, թե ինչու է որոշում կայացրել լքել «Քաղաքացիական պայմանագիր» կուսակցությունը։ Նրան նախապես խոստացել են, որ կարող է ռեյտինգային կարգով առաջադրվել թիվ 3 ընտրատարածքում, որն ընդգրկում է նաև Մալաթիա-Սեբաստիա վարչական շրջանը։ Տարածքային կառավարման և զարգացման հարցերի նախարարի պաշտոնակատար Սուրեն Պապիկյանի հորդորով սկսել է նախապատրաստական աշխատանքները, տարածք է վարձակալել, քննարկումներ սկսկել քարոզարշավի անցկացման վերաբերյալ։ Սակայն, այնուհետև շատ պատահական կերպով իմացել է, որ ցուցակում ինքը ներառված չէ, Պապիկյանը հայտնել է, որ վարչությունը չի հաստատել թեկնածությունը։ Պատճառների մասին, ըստ նրա, իրեն չեն տեղեկացրել։ Գևորգ Աճեմյանի խոսքով` հիմա կուսակցությունում անառողջ մթնոլորտ է ստեղծվել, ինչն էլ իր հրաժարականի հիմքն է հանդիսացել: 

Հրաժարական էր ներկայացնել նաև ընդամենը երեք ամիս արդարադատության փոխնախարար աշխատած Տիգրան Խաչիկյանը: Հիշեցնենք, որ Տիգրան Խաչիկյանն այն անձն էր, որ Նիկոլ Փաշինյանի վարչապետ դառնալուց հետո ստեղծած կադրային բանկից էր փոխնախարար նշանակվել։ Հետևելով վարչապետի կոչին` Տիգրան Խաչիկյանը մրցութային հիմունքներով ընդգրկվում է վարչապետի ստեղծած կադրային բանկում և ապրիլի 4-ին նշանակվել արդարադատության նախարարի տեղակալ։ Ի դեպ, շրջանառվող լուրերի համաձայն՝ Խաչիկյանին հորդորել է հրաժարականի դիմում գրել արդարադատության նորանշանակ նախարար Ռուստամ Բադասյանը՝ պատճառաբանությամբ, որ նա իր թիմի կոնցեպտի մեջ չէ: 

Իմ քայլը խմբակցության անդամ Էդգար Առաքելյանը վայր էր դրել մանդատը և չնայած նա այդ քայլը պատճառաբանել էր անձնական մոտիվներով` մամուլում համառորեն պտտվում էին լուրեր, որ իրականում հրաժարականի համար հիմք է հանդիսացել Առաքելյանի սկզբունքային դիրքորոշումը Ամուլսարի հարցում: 

Մանդատից հրաժարվեց նաև Իմ քայլի պատգամավոր Արսեն Ջուլֆալակյանը, պատճառը՝ ԿԳՄՍ նախարարության քայլերի և վարած քաղաքականության հետ սկզբունքային անհամաձայնությունն էր: 

ԿԳՄՍ վարած քաղաքականության հետ իր անհամաձայնության պատճառով հրաժարական է ներկայացրել նաև Բարձրագույն որակավորման կոմիտեի նախագահ Սմբատ Գոգյանը: Որոշման մի քանի պատճառների մեջ Գոգյանը նշել է, որ կրթության և գիտության բարեփոխման իր պատկերացումները չեն համընկել նախարարության ռազմավարության հետ և ժամանակի ընթացքում այդ հակասությունները խորացել են։ 

Պաշտոնից հրաժարական ներկայացրեց նաև Շրջակա միջավայրի նախարար Էրիկ Գրիգորյանը: Հրաժարականի տեքստից էլ ակնհայտ էր, որ վերջինս դժգոհ է՝ իր աշխատանքի հանդեպ կառավարության ունեցած գնահատականից, սակայն խնդիրը շատ ավելի խորքային է և բազմաթիվ վերլուծաբաններ Գրիգորյանի հեռանալը կապում են Ամուլսարի հարցում Նիկոլ Փաշինյանի բանեցրած պրեսինգի հետ, որին նախարարը չի ցանկացել տրվել:

ՀՀ տնտեսական զարգացման և ներդրումների փոխնախարար Հակոբ Ավագյանը նույնպես հրաժարականի դիմում էր ներկայացրել: Որպես հրաժարականի պատճառ` նա նշել է նոր կառավարության «հավակնոտ ծրագրերի իրականացման ցածր հավանականությունը»: 

Չմոռանանք նշել նաև ԱԱԾ պետ Արթուր Վանեցյանի հրաժարականը: Այս հրաժարականի մասով վարկածները պտտվում են մինչ օրս էլ, սակայն ամենատարածված վարկածն այն է, որ վարչապետ Նակոլ Փաշինյանը պահանջել է ԱԱԾ պետից երկրորդ նախագահ Ռոբերտ Քոչարյանի գործով որոշում կայացնելուց առաջ ճնշում գործադրի դատավոր Աննա Դանիբեկյանի վրա, ինչն էլ Վանեցյանը հրաժարվել է կատարել: 

Վերը նշված օրինակները գալիս են ապացուցելու, որ հեղափոխությունից հետո քաղաքականության վարած գծից, իսկ ավելի ճիշտ կլինի ասել՝ այդ գծի փոփոխությունից հիաթափվել է ոչ միայն հանրության մի զգալի հատված, այլ նաև այն մարդիկ, այն պաշտոնյաները ովքեր հեղափոխական թիմի հետ են եկել իշխանության , կամ պարզապես սկզբնական շրջանում հավատացել են այն թեզերին որոնք առաջ են քաշվել Փաշինյանի կողմից, իսկ այնուհետև այդ թեզերի կտրուկ փոփոխման արդյունքում որոշում են կայացրել թողնել իրենց պաշտոնները: Ընդ որում, պետք է նշել, որ շուրջ մեկ տարի առաջ սկիզբ առած այս պրոցեսը, կարծես թե. շարունակվելու և ավելի մեծ մասշտաբներ ձեռք բերելու միտում ունի… 

Այս թեմայով Երկու քարի արանքում. ո՞ւմ ի վերջո «կքցի» Փաշինյանը Գազի գինը կարող է բարձրանալ. Փաշինյանի միակողմանի զիջումների հետևանքը Փաշինյանը և ՀՀ-Ֆրանսիա բարեկամական խմբի ղեկավարը քննարկել են Տավուշում սահմանազատման գործընթացը Էս քո համար ա հող, պարոն Փաշինյան, մեզ համար սրբազան հայրենիք ա. նոյեմբերյանցի (տեսանյութ) Եթե այսպես շարունակվի՝ վերամասնակցությունը ՀԱՊԿ–ում դառնա գործնականում անհնարին․ Փաշինյան 48 ժամը լրացել է․ Միհրան Պողոսյանը պատրաստվում է իշխանափոխություն անել Պատրաստ ենք քայլեր ձեռնարկել, որ «ադրբեջանական գյուղերում» ապրելը հնարավոր դառնա․ Փաշինյան 29,743 քառ. կմ տարածքից անդին ՀՀ-ն հավակնություններ չունի ոչ մի ուղղությամբ. Փաշինյան «Ինչո՞ւ եք շարունակում մնալ ՀԱՊԿ անդամ»․ հարց՝ Փաշինյանին Հայաստանը չի պատրաստվում պատերազմ վարել Լեռնային Ղարաբաղի համար․ Փաշինյան (տեսանյութ)