Սիրիացի զինյալները Ադրբեջան մեկնելու մասին իմացել են դեռ օգոստոսից. հետաքննություն. «Ամերիկայի ձայն»

Արցախ 2 Հոկտեմբեր, 2020 10:41

Թուրքիայի կողմից սիրիացի զինյալ ապստամբերի Ադրբեջան ուղարկելու փաստը միջազգային մամուլում շրջանառվել է դեռ օգսոստոս ամսից: Այս մասին տեղեկացնում է «Ամերիկայի ձայնը»:

Բրիտանական «The investigative journal»-ի հետաքնության մեջ Լիբիայում կռվող սիրիացի ապստամբներից ոմանք պատմել էին, որ իրենց ասվել է, թե Ադրբեջան են գնալու ավելի շատ գումարի դիմաց, քան Լիբիայում էին ստանում:

Սիրիայի Աֆրին քաղաքի ծագում ունեցող «Սուլթան Մուրադ» զինված խմբավորման անդամ Հասան Բաքրին (անունը փոխված է) ասել է. «Մի քանի ամիս առաջ մենք լսեցինք, որ Թուրքիան սիրիացիներին կուղարկի Եմեն: Բայց վերջերս մենք լսեցինք, որ միգուցե գնանք Ադրբեջան»:

«Ես լսել եմ, որ մենք գնալու ենք Ադրբեջան կամ ինչ էլ որ այն կոչվեր»,- ասել է Համզայի դիվիզիայի անդամ Օմար Յաղրին` սխալ արտասանելով երկրի անունը. «Լսեցի, որ նրանք մեր ներկայիս աշխատավարձին 2000 կամ 3000 դոլար կավելացնեն: Ես ուզում եմ գնալ, եթե դա ճիշտ է, քանի որ դա ավելի լավ է, քան նույնիսկ Լիբիայում $2000 ստանալը»:

Օմար Յաղրին չգիտի, թե որտեղ է Ադրբեջանը: «Ինձ չի հետաքրքրում», – ասել է նա: «Կարևորը փողն է: Եթե դա լուրջ է, ես և շատ ուրիշներ ցանկանում ենք գնալ»:

Բարձր աշխատավարձի հույսով Ադրբեջան հասած, և ղարաբաղյան ռազմական գործողությունների ժամանակ վիրավորված ապստամբներն ավելի ուշ պարզել են, որ խաբվել են:

«Նրանք մեզ խաբեցին: Նրանք մեզ ասացին, որ գալիս ենք պահպանելու թուրքական հենակետը: Հետո մենք հասնում ենք այստեղ և մեզ ուղարկում են միանգամից մարտի »,-ասել է Ադրբեջանի կողմից Ղարաբաղի մարտերին մասնակից, սիրիական «Համզա» խմբավորման զինյալներից մեկը՝ հավելելով. «Մարտերը նման չեն այն ամենին, ինչ ես տեսել եմ: Դա նման է ֆիլմի: Անընդհատ ռմբակոծություն է»:

Ղարաբաղում ռազմական ակտիվ գործողությունների մեկնարկից երկու օր անց մ Reuters միջազգային լրտավական գործակալությունը, հղում անելով սիրացի այլ ապստամբների հետ արված հարցազրույցներին, հաղորդել էր, որ Թուրքիան Ադրբեջան է տեղափոխել շուրջ 4000 սիրիացի զինյալ:

Բրիտանական The Guardian պարբերականը ևս անդրադարձել է նույն թեմային՝գրելով. «Սիրիացի ապստամբ մարտիկները գրանցվել են մասնավոր թուրքական անվտանգության կազմակերպությունում ՝ որպես սահմանապահներ Ադրբեջանում»:

Սիրացի զինյալների մասին հայտարություն է արել Ֆրանսիայի նախագահ Էմանուել Մակրոնը՝ նշելով, որ փաստեր ունի:

Ավելի վաղ Ռուսաստանի նախագահ Վլադիմիր Պուտինի մամուլի քարտուղարը ասել էր, որ ՌԴ անվտանգության խորհրդակցության մասնակիցները նշել են տարածաշրջան Սիրիայից և Լիբիայից զինյալների տեղափոխման հետ կապված ծայրահեղ վտանգը:

Չնայաց հայկական մամուլում շրջանառվող լուրերին թե, ԱՄՆ Պաշտպանության նախարարության ներկայացուցիչը, որի անունը չի հրապարակվել, Sky News Arabia-ին հաստատել է, որ ճիշտ են այն տեղեկությունները, որ Թուրքիայի կողմից 100-ավոր սիրիացի վարձկաններ են տեղափոխվել Ադրբեջան:

«Տեղեկություններն այն մասին, որ Թուրքիայի ու Ադրբեջանի միջև տասնյակ չվերթներով հարյուրավոր սիրիացի վարձկաններ են տեղափոխվել, հաստատված է և ճիշտ»,- ասել է նա: Ամերիկյան կողմի այս արձագանքի մասին ԱՄՆ պաշտոնական աղբյուրներից դեռ հաստատում չկա:

Թեհրանը հայտարարել է, որ «թույլ չի տա, որ ահաբեկչական խմբավորումները Իրանի հյուսիսային սահմաններին հարակից շրջաններն իրենց ազգային անվտանգության դեմ սպառնալիքի վերածեն»:

«Միջազգային հանրությունը հստակ արձանագրեց՝ ադրբեջանաթուրքական տանդեմը Արցախի ու Հայաստանի դեմ կռվում է վարձկան-ահաբեկիչների օգնությամբ»,-գրել է Հայաստանի վարչապետ Նիկոլ Փաշինյանը: