Արցախը չի լինելու Ադրբեջանի կազմում. Շարմազանովը մանրամասնում է՝ ինչ են քննարկել արտախորհրդարանական ուժերը վարչապետի հետ հանդիպմանը
ՔաղաքականՔաղաքական ուժերին հրավեր է եղել, խնդիրը եղել է Արցախը, յուրաքանչյուր քաղաքական ուժ իր կարծիքն է արտահայտել. սրանից ավելի ինֆորմացիա չեմ կարող տալ։ Մենք մեր կարծիքը շատ հստակ ասել ենք՝ Արցախը չի լինելու Ադրբեջանի կազմում։ Չեմ կարող ասել, թե հանդիպմանը ինչ է քննարկվել։ Իմ մասնավոր կարծիքով, պետք է անել հնարավորինս, որպեսզի այդ հրադատարի ռեժիմն աշխատի: Պատմական կարևոր, խառը ժամանակաշրջան է մեր երկրի համար և չպետք է առաջ գնալ ներքաղաքական օրակարգերով։ Այս մասին այսօր ՀՀ վարչապետ Նիկոլ Փաշինյանի և արտախորհրդարանական ուժերի միջև կայացած հանդիպումից հետո լրագրողների հետ զրույցում ասաց ՀՀԿ քարտուղար Էդուարդ Շարմազանովը:
Հարցին՝ Արցախի հարցի շուրջ Սերժ Սարգսյանի հետ ներկուսակցական քննարկում եղե՞լ է, Շարմազանովը պատասխանեց. «Ես որ այստեղ եմ, բնականաբար, եղել է ներկուսակցական քննարկում և ես ինքնագլուխ չեմ եկել ներկայացել այս հանդիպմանը։ Ես հասկանում եմ, որ գայթակղությունը մեծ է ինձնից քաղել այն, ինչ դուք շատ եք ուզում, բայց ես ասում եմ այն, ինչ-որ տվյալ ժամանակաշրջանում պետք է: Այսօր մենք ռազմական դրության մեջ ենք, ես ավել բան չեմ կարող ասել։ Արցախի անկախության ճանաչումը, իմ խորին համոզմամբ, պետք է արվի այն ժամանակ, որն օգուտ կբերի Հայաստանի դիրքերի ամրապնդմանը և կլինի շարունակական միջազգային հանրության կողմից»։
Լրագրողները հետաքրքրվեցին, թե արդյոք Սերժ Սարգսյան-Նիկոլ Փաշինյան հանդիպում եղել է, Շարմազանովն էլ նշեց, որ այս հանդիպմանը ներկայացել է որպես Սերժ Սարգսյանի թիմի անդամ։