Թրամփը հրամայել է սկսել իշխանության փոխանցումը Բայդենին
ԱՄՆԱՄՆ նախագահ Դոնալդ Թրամփը հայտնել է, որ ինքը հրամայել է Ընդհանուր ծառայությունների վարչակազմին (GSA) պատրաստվել արարողակարգով իշխանությունը Բայդենին փոխանցելու համար։
Ավելի վաղ CNN հեռուստաալիքը հաղորդել էր, որ GSA- ն ու նրա ղեկավար Էմիլի Մերֆին դեմոկրատ թեկնածուին ճանաչել են որպես ընտրություններում հաղթող և հայտարարել են իշխանության փոխանցումը սկսելու պատրաստակամության մասին:
«Մեր գործը առաջ է ընթանում։ Մենք շարունակելու ենք քրտնաջան պայքարել, և վստահ եմ, որ կհաղթենք: Այնուամենայնիվ, մեր երկրի շահերից ելնելով՝ ես խորհուրդ եմ տալիս Էմիլի Մերֆիին և նրա թիմին անել այն, ինչ անհրաժեշտ է՝ արարողակարգով իշխանությունը Բայդենին փոխանցելու համար», - գրել է Թրամփը Twitter-ի իր էջում: Այսպիսով, Ամերիկայի առաջնորդը կրկին հրաժարվել է ընդունել պարտությունը ընտրություններում՝ չնայած թույլ է տվել սկսել իշխանության փոխանցման պաշտոնական ընթացակարգերը: Բայդենի շտաբը նշել է նաև, որ այս հարցը վերջնական լուծում է ստացել:
Պետության հաջորդ ղեկավարի երդմնակալության արարողությունը կլինի 2021 թվականի հունվարի 20-ին: