Գերիների վերադարձի պահանջով վարչապետի հետ հանդիպած քաղաքացիները դուրս եկան Կառավարության շենքից
ՀասարակությունԱնհետ կորածների հարազատների՝ 15 հոգանոց խմբի և Փաշինյանի միջև 3 ժամ տևած հանդիպումը քիչ առաջ ավարտվեց: Անհետ կորածի հորեղբայրը լրագրողների հետ զրույցում ասաց, որ իր համար, որևէ բան չի փոխվել հանդիպումից հետո. «Ես իմ հարցերի պատասխանները չեմ ստացել, բավարարված չեմ մեր կառավարությունից, նորից գնալու եմ թուրքերի հետ բանակցեմ»,- ասաց անհետ կորածի հորեղբայրը:
Նա նշեց նաև, որ իրենց երեկվա ակցիան, որոշները սխալ են մեկնաբանել. «Ես ասում եմ՝ մենք չենք քաղաքականացնում մեր երեկվա ակցիան, բայց նույն այդ պահին մեր ակցիան քաղաքականացնում են»,- նշեց անհետը կորածի հարազատը:
Հիշեցնենք, որ անհետ կորածների հարազատները երեկ բողոքի ակցիա էին իրականացրել՝ ժամեր շարունակ փակ պահելով Բաղրամյան-Պռոշյան փողոցները: Նրանց առաջարկվել էր հանդիպում ՀՀ փոխվարչապետ Տիգրան Ավինյանի հետ, որը մերժվել էր: Հարազատների պահանջով՝ Նիկոլ Փաշինյանը որոշում էր կայացրել ընդունել և լսել նրանց։ Իսկ այսօր արդեն՝ ժամը 10:00-ին տեղի ունեցավ հանդիպում-քննարկումը։
Անհետ կորածների հարազատների պահանջներն են՝
1. բանակցել և որոնել անհետ կորածներին
2. տեր կանգնել գերի ընկած մեր տղաներին, ապահովել նրանց շուտափույթ վերադարձը
3. ձեռք բերել ԴՆԹ թեստավորման սարքեր, քանի որ այս տեմպերով դիերի ճանաչման գործընթացը կտևի մի քանի տարի
4. շրջափակումից դուրս բերել զինվորական և քաղաքացիական անձանց
5. շարունակել դիերի որոնման աշխատանքները: