Հրամանատարները երեխեքին տարել են ու փախել, ով է պատասխան տալու. անհետ կորած զինծառայողի մայր
ՀասարակությունԶինվորների հարազատները ՔԿ զինվորական քննչական գլխավոր վարչության մոտ ակցիա են իրականացնում:
«Ես Գարիկ Մխիթարյանն եմ՝ Մխիթար Մխիթարյանի հայրը, որը զոհվել է հոկտեմբերի 6-ին, մարմինը մեր ուժերով գնացել ենք, գտել ու հանձնել հողին: Մենք նոյեմբերի 2-ին տվել ենք հայտարարություն հանցագործությունների մասին, որը վերաբերում էր ղեկավարներին, այսինքն՝ բարձրաստիճան պաշտոնյաներ, գեներալներ, գումարտակի հրամանատարներ կան, որոնք պետք է ենթարկվեն պատասխանատվության: Մինչև այսօր, քանի որ մեր հայցի պատասխանը դեռ բավարարված չէ, մարդիկ կային, որոնք պետք է քննվեին, բայց հանգամանքները դեռ բավարար չեն, մեր հարցի լուծումը մնացել է օդում կախված»,- նշեց զոհված ժամկետային զինծառայողի հայրը:
Վերջինս նշեց, որ որևէ միտում չի տեսնում իրենց գործը չքննելու, դա կապվում է այն հանգամանքի հետ, որ այս շրջանում նմանատիպ գործերը շատ են, իսկ ժամանակը՝ քիչ:
ՔԿ զինվորական քննչական գլխավոր վարչության մոտ է գտնվում նաև մի ծնող, որը իր երեխայից հոկտեմբերի 9-ից որևէ տեղեկություն չի ստացել. «Մենք ուզում ենք, որ մեր ձայնը տեղ հասնի, որ բոլորը աշխատեն այս ուղղությամբ, որ չգնան տանը հանգիստ նստեն, իսկ մենք ամբողջ օրը վազենք այստեղից այնտեղ, այնտեղից այստեղ: 3 ամսից ավելի է՝ ես իմ երեխայից լուր չունեմ, ո՞ւմից պետք է ուզեմ իմ երեխային: Տղաս Ջաբրայիլում է ծառայել, վերջին անգամ հետը խոսել եմ հոկտեմբերի 9-ին, ինձ ասաց, որ դիրքեր է գնում և այլևս չի կարողանա զանգահարել, քանի որ հեռախոս չունի: Հրամանատարները երեխեքին տարել են ու փախել են, ինչի՞ եք փախել, բա պիտի պատասխան տաք»,- ասաց անհետ կորածի մայրը: