Արման Թաթոյանը՝ սահմանազատման ժամանակ մեխանիկական մոտեցումներ կիրառելու սխալի մասին
ՀասարակությունԱյսօր՝ հունվարի 12-ին, ՀՀ մարդու իրավունքների պաշտպան Արման Թաթոյանը ասուլիսը սկսելուց առաջ նշեց, որ այն վերաբերելու է ՀՀ սահմանների որոշման գործընթացին, և դրա ազդեցությանը մարդու իրավունքների վրա: Այն գլխավորապես հիմնված է լինելու Գեղարքունիքի և Սյունքի մարզեր իրենց այցերի և շարունակաբար տեղի ունեցող ուսումնասիրությունների ու հետազոտությունների մոնիթորինգային աշխատանքների վրա: Նա նաև նշեց, որ անդրադարձ կլինի գերիներին վերաբերող մի շարք հարցերի՝ հատկապես Ադրբեջանի քաղաքականությանը այդ հարցում. «Սահմանների որոշման հարցում պետք է պատասխանել երկու հիմնական հարցի, առաջինը՝ մենք արդյոք ունենում ենք մարդու իրավունքների խախտում, թե՞ ոչ, և երկրորդ հարցը՝ արդյոք այդ ամենի հետևանքով վտանգվում է մեր երկրի սահմանների անվտանգությունը և անձեռնմխելիությունը, այս գործընթացները սերտորեն իրար կապված են: Մեզ համար կարևոր նշանակություն ունի, այն որ սահմանների որոշման նպատակը պետք է լինի արդյոք մենք ունենք խաղաղություն և համերաշխություն մեր ժողովուրդի իրավունքների տեսանկյունից»,- այս մասին ասուլիսին ընդգծեց Արման Թաթոյանը:
Նա նշեց, որ իրենց կատարած մոնիթորինգը արձանագրել է խնդրահարույց դեպքեր, և իրենց գնահատականնները հիմնված են հստակ օրինակների վրա: Ըստ Արման Թաթոյանի՝ սահմանազատման ժամանակ կիրառվում է մեխանիկական մոտեցումներ, սակայն սահմանների որոշման գործընթացը չի կարող ընթանալ մեխանիկական մոտեցումներով. «Մենք տեղում իրականացրեցինք ուսումնասիրություն և օգտագործեցինք Google քարտեզից բացի, նաև այլ մասնավոր կազմակերպությունների քարտեզներ, օրինակ՝ Apple հեռախոսը, Yandex քարտեզը, որոնք ամբողջ ամբողջական գյուղը ցույց են տալիս հայկական: Իսկ արդեն Ստյոպա Մովսիսյանի անասնագոմը բաժանված է երկու մասի՝ ադրբեջանական և հայկական, հենց այդ մարդու տան բակում տեղակայված է մեր սահմանապահ զորքերի վերակարգը, այս պարագայում այդ մարդը ինչպես է օգտվելու իր իրավունքներից»,- ասաց Արման Թաթոյանը: