Անանուն աղբյուրներից օգտվող լրագրող-վարչապետը սկսել է խորշել «օդում կախված» լուրերից. ինչո՞ւ

«Իմ քայլը» խմբակցության մի խումբ պատգամավորներ առաջարկում են «Զանգվածային լրատ­վության մասին» օրենքում փոփոխություններ կատարել՝ անանուն աղբյուրներին հղում անելն արգե­լելու նպատակով:

«Նախագծում կան շատ խնդրահարույց և թերի կետեր, կարող եմ փաստել, որ նախագծի հեղինակները հաջողության չեն հասել»: Այս մասին ԼՈՒՐԵՐ.com-ի հետ զրույցում ասաց Ինֆորմացիայի ազատության կենտրոնի ղեկավար Շուշան Դոյդոյանը:  

Նա այն կարծիքին է, որ թեև սահմանափակումը այդքան էլ մեծ և ռեալ վտանգ չի ներկայացնում լրագրողական դաշտի համար, այնուամենայնիվ այդ նախագծի ընդունման անհրաժեշտությունը չկա՝ կապված անանուն աղբյուրների կիրառման հետ. «Նախագծով չի արգելվում տվյալ աղբյուրից ստացված տեղեկատվության հրապարակումը, պարզապես տեղեկատվության ողջ պատասխանատվությունը պետք է կրի տվյալ լրատվամիջոցը»,- ասաց նա՝ հավելելով՝ այդ նախագծով լրագրողի առջև հավելյալ պատասխանատվություն է դրվում, որով հենց լրագրողը կստանձնի տվյալ տեղեկատվության իսկության համար պատասխանատվությունը:

Դոյդոյանը մեզ հետ զրույցում անդրադարձավ նաև նախագծի թերի կողմերին. «Նախագծով սահմանվում է, որ  լրատվամիջոցների հովանավորությունը,   կլինի դա 1000 դրամ, թե 1 մլն, պետք է արտացոլված լինի ԶԼՄ-ի ֆինանսական հաշվետության մեջ, որը սխալ մոտեցում է, ինչ-որ նվազագույն շեմ է պետք սահմանել, օրինակ, կես մլն դրամ և ավելի նվիրատվություն կատարած անձանց տվյալները նոր արդեն արտացոլված լինեն ֆինանսական հաշվետվություններում, հակառակ դեպքում՝ լրացուցիչ տեխնիկական բեռ ենք դնում լրատվամիջոցների վրա»,- պարզաբանեց Շուշան Դոյդոյանը: 

Իսկ մյուս թերի կողմը, որը մեր զրուցակիցը ցանկացավ նշել, վերաբերում էր «անանուն աղբյուր» հասկացությանը, որը զետեղված էր նախագծում. «Անանուն աղբյուր տերմինը ընդհանրապես սխալ է գործածված, քանի որ անանուն աղբյուրները շատ ավելի լայն ու ընդարձակ հասկացություն են, ձևավորված պրակտիկա կա, և նման տերմինի սխալ և աղճատված օգտագործումը արդեն իսկ կարող է վատ պրակտիկայի ձեւավորման պատճառ դառնալ»:

Իսկ հաջորդ կարևորագույն խնդիրը, որով փորձ է արվում լուծել, ըստ Շուշան Դոյդոյանի, լրատվամիջոցների իրական սեփականատերերի թափանցիկության հարցն է և ֆինանսական հաշվետողականության բարձրացումը. «Շատ եմ կարևորում այս կետը և վաղուց պետք է լուծում տրվեր այս խնդրին, բայցև շատ կետեր կան, որոնք թերի են ներկայացված և լիարժեք չեն, պետք է վերադառնան հետ և մասնագիտական քննարկումներ անցկացնեն լրագրողական համայնքի հետ և գտնեն այն ոսկե միջինը, որը չի վնասի լրատվամիջոցի ազատությանը և չի սպառնա նրա ֆինանսական աղբյուրներ ունենալու հնարավորությանը »,- ընդգծեց Շուշան Դոյդոյանը:

Նա անընդունելի համարեց տվյալ նախագծի երևան գալը՝ դրա մասին նախապես առանց լրագրողական համայնքին տեղյակ պահելու. ««Զանգվածային լրատ­վության մասին» օրենքում փոփոխությունների մշակման ընթացքը իրականացվում է մասնագիտական համայնքի անմիջական մասնակցությամբ, ոչ թե մենք գրենք, դուք կարդաք, հետո կարծիք ասեք: Մենք համատեղ պետք է մշակենք նման կարևորագույն, առանցքային իրավական ակտերի որևէ տառի, բառի փոփոխություն »,- եզրափակեց Ինֆորմացիայի ազատության կենտրոնի ղեկավարը:

Հիշենք, որ վարչապետ Նիկոլ Փաշինյանը, ով ոչ վաղ անցյալում աշխատում էր որպես լրագրող, շատ հաճախ, անմասն չէր մնում անանուն աղբյուրներին կամ օդում կախված լուրերին հղում տալուց: Եվ ով, եթե ոչ նախկին լրագրողը լավագույնս պետք է տիրապետեր լրագրողական գործունեության նրբություններին:

Լրագրողական գործունեությունը սահմանափակող այս նախագիծը գուցե նաև պայմանավորված է այն հանգամանաքով, որ վերջին շրջանում լրագրողների, այսպես կոչված, անանուն աղբյուրները սկսել են «շատ խոսել» և շատ տեղեկություններ տրամադրել, ինչը հավանաբար դուր չի եկել իշխանություններին:

Զվարթ Պետրոսյան

Այս թեմայով 1 տարեկան երեխայի վիճակը գնահատվել է ծանր․ Շուշան Դանիելյան Հավանության է արժանացել «Գրադարանների և գրադարանային գործի մասին» օրենքում փոփոխություններ կատա­րելու մասին օրենսդրական նախաձեռնությունը Ինչ փոփոխություններ է արձանագրել տարադրամի շուկան ապրիլի 9-ին Մահացել է ԱԺ նախկին պատգամավոր Շուշան Սարդարյանի մայրը Իրազեկում. փոփոխություններ տուգանային միավորների կիրառման վերաբերյալ ԼՂ-ից բռնի տեղահանվածների մասնագիտացման և աշխատանքի տեղավորման ծրագրում սահմանափակումներ չկան, բոլոր ցանկացողները կարող են դիմել Դատախազությունում տեղի են ունեցել կադրային փոփոխություններ ՀՀ-ում ձվի շուկան ինքնաբավ է, գնային էական փոփոխություններ չեն սպասվում․ ՄՊՀ Փոփոխություններ եւ լրացումներ են նախատեսվում «Ավտոմոբիլային ճանապարհների մասին» եւ «Պետական տուրքի մասին» օրենքներում Ռուսական գազի գինը մինչև 2031 թ. չի թանկանա, եթե աշխարհաքաղաքական փոփոխություններ չլինեն. փոխնախարար