«Հիմա Քոչարյանը կասի՝ ինչ է՝ ամեն անգամ պետք է դայակի նման գամ ձեր տակդիրները փոխե՞մ»
ՔաղաքականՀայտնի բժիշկ Գեորգի Պողոսյանը այսօրվա ասուլիսին ասաց, որ հավաքներ կազմակերպելը համարում է անիմաստ. «Ես մի երկու անգամ գնացել եմ այդ հավաքներին, բայց հետո էլ չգնացի, ես սրտով իրենց հետ եմ, ես պատրաստ եմ ամեն ինչի: Բայց ես համարում եմ, որ պայքարի այդ ճանապարհը ինչ-որ մի տեղ անիմաստ է, որովհետև մենք գործ ունենք մի մարդու հետ, որը կառչել է իր աթոռից և պրակտիկորեն ինչ ուզում եք արեք, փոփոխություն չի լինի»,- նշեց բժիշկը:
Նա ասաց, որ բոլորը ամեն ինչ գիտեն, սկսած մետաղի թափոնների պատմությունից, վերջացրած զենքի և քարերի պատմությունից. «Բոլորը գիտեն, բայց ոչինչ չի փոխվում, ինչու է այդպես: Չհաշված մի փոքր խումբ, որը ես կանվանեի աղանդավորների խումբ, որոնց հոգևոր հովիվը Նիկոլ Փաշինյանն է, բոլորը հասկանում և տեսնում են, թե ինչ է կատարվում»,- ընդգծեց բժիշկը:
Վերջինս այն կարծիքին է, որ երկրի իրավիճակը կայունացնելու համար, նախ պետք է հասկանալ, թե ինչ խնդիրներ են ծառացած երկրի առաջ. «Առաջինը պետք է բանակը վերականգնել, էկոնոմիկան բարձրացնել, վերացնել հայաստանյան սորոսական և ծախու երևույթները, արտաքին աշխարհի հետ նորմալ կապեր վերահաստատել: Պետք է ընտրենք, թե որ մարդը կարող է այս ամենը իրականացնել, և ես միակ մարդ եմ տեսնում, այն Ռոբերտ Քոչարյանն է: Ես համարում եմ, որ այդ մարդուն պետք է շատ խնդրենք, որ ինքը ետ գա, ես իր փոխարեն լինեի, չէի գա, ինքը լավ ապրում է, լավ փող ունի, Ռուսաստանում Պուտինի ընկերն է, ինչու պետք է անդարդ գլուխը բերի այս խառնաշփոթի մեջ»,- ընդգծեց Գեորգի Պողոսյանը:
Բանախոսը ասաց, որ Ռոբերտ Քոչարյանից բացի չի տեսնում այդ մասշտաբի մեկ այլ պետական գործչի. «Քոչարյանը շատ անգամ է ետ եկել, հիմա էլ կասի՝ ինչ է՝ ամեն անգամ պետք է դայակի նման գամ ձեր տակդիրները փոխե՞մ»,- ասաց բժիկը, հավելելով, որ որպես պետական գործից հարգում է նաև Վազգեն Մանուկյանին, բայցև շեշտեց, որ վերջինս չունի այնքան խարիրզմա, որքան Ռոբերտ Քոչարյանը:
«Ռոբերտ Քոչարյանի ձեռքով ես այն ժամանակ կորցրեցի բաժանմունքս, ինձ ասացին, որ այն պետք է վերցնեն Ռիտա Պալյանը և Հրանուշ Հակոբյանը: Ես նրա կողմից տուժված մարդ եմ, զանգ տվեցի Ռոբերտ Քոչարյանի օգնականին, ասաց՝ չէ, ես դա պետք է վերցնեմ, շատ ջղայնացա, բայց անցան տարիներ: Հիմա մենք ունենք և Հայ-ամերիկյան կենտրոն, որտեղ կրծքաբուժությամբ են զբաղվում, և իմ բաժանմունքը: Ուրեմն այդ մարդը ճիշտ էր որոշել»,- ասաց բանախոսը: