«Եթե մեկն ընկներ, ոտքը ջարդեր, դուրս է գալիս, որ մեղավորը Տարոն Մարգարյանն է»

Hraparak.am-ը գրում է․

Երեւանի նախկին քաղաքապետ Տարոն Մարգարյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով, այսինքն՝ պաշտոնեական լիազորությունների չարաշահում։ Եթե վերծանելու լինենք Քննչական կոմիտեի երկարաշունչ, տաղտկալի հաղորդագրությունը, մեկ նախադասությամբ կարող ենք ասել՝ իրավապահ մարմինը նախկին քաղաքապետին մեղադրում է նրանում, որ 2011թ. սեպտեմբերից մինչեւ 2014 թվականը համայնքային հողատարածքներից տարածքներ է նվազեցրել՝ աճուրդի միջոցով, էժան գնով իր մերձավոր-մտերիմներին վաճառելու համար։ 2018-ին հարուցված այս գործի մասին, ՔԿ-ն հայտարարում է նախօրեին, կասկած կա, որ «նախկինների» դեմ քրեական գործերը կրկին ջրի երես են հանում քաղաքական այս խառը իրավիճակում՝ մարդկանց աչքին թոզ փչելու համար, թե «թավիշն» ավարտվել է։ Տարոն Մարգարյանի պաշտպանությամբ զբաղվում է փաստաբան Բենիկ Գալստյանը։ Մենք զրուցել ենք նրա հետ․

-Դուք միջնորդել եք որոշակիացնել Տ․Մարգարյանին առաջադրված մեղադրանքը, ի՞նչ պատասխան եք ստացել։

-Բազմաթիվ մտքեր կային, որոնք նշվել էին քննիչի կողմից, կարող էին մեկնաբանվել տարբեր ձեւ, կարող էին չմեկնաբանվեին առհասարակ, որը որոշակիության սկզբունքին հակասում է։ Այդ մասով ասել եմ՝ որոշակիացրեք, ըստ էության՝ այդ միջնորդության վերաբերյալ տեղեկություն չունենք։

-Օրինակ՝ մեղադրանքի ո՞ր մասը ձեզ հասկանալի չէ, մեծ հաղորդագրություն են տարածել, թվարկել, թե ենթադրաբար ինչեր է արել նախկին քաղաքապետը։

-Այ, խնդիրը կայանում է նրանում, որ Տարոն Մարգարյանը դե յուրե այդ գործողություններին որեւէ առնչություն չի ունեցել եւ չէր էլ կարող ունենալ, ոնց հասկացա՝ գույքն օտարվել է աճուրդներով, իսկ օտարման կարգը նախատեսված է օրենքով։ Տարոն Մարգարյանն այնքան մասնակցություն է ունեցել, ինչքան՝ ես, այսինքն՝ զրո։ Քննիչին խնդրել ենք պարզաբանել։ Օրինակ, եթե քաղաքապետարանում մեկը պատուհանից իրեն ցած նետեր, էլի մեղավորը Տարոն Մարգարյա՞նն էր դուրս գալիս, աբսուրդ է։ Ինչ վերաբերում է մերձավորներին, սանիկ էին նշել, այսպես ասեմ․ քրեական գործերով որեւէ տեղեկատվություն կամ որեւէ տվյալ չկա առ այն, որ անձանցից ինչ-որ մեկը, որը մասնակցել է աճուրդի, գնել է ինչ-որ գույք, եղել է Տարոն Մարգարյանի հետ այս կամ այն չափով մտերիմ։ 

-Այսինքն՝ Տարոն Մարգարյանի դեմ ցուցմունք չկա։

-«Դեմ» ցուցմունքն անհասկանալի է։

-Իսկ այդպիսի մարդ կա՞, որ թեկուզ անհիմն ինչ-որ բան է ասել Տարոն Մարգարյանի դեմ։

-Այդպիսի մարդ լինելու վերաբերյալ մենք տեղեկություն չունենք, ամենայն հավանականությամբ՝ չկա էլ։ Ենթադրում եմ, որ ենթադրել են էսինչ մարդը Տարոն Մարգարյանի հետ մոտիկ է, որովհետեւ Մարգարյանն ունի հեղինակություն, իրեն բոլորը ճանաչում են։

-Ինչպես հասկացա՝ Տարոն Մարգարյանը եղել է Երեւանում, ներկայացել է ՔԿ, սակայն նրա վերաբերյալ հետախուզում է հայտարարվել։

-Շատ աբսուրդային է․ խնդիրն ինչո՞ւմն է՝ փետրվարի 7-ին Տարոն Մարգարյանը մեկնում է Մոսկվա՝ բուժզննման նպատակով, մեկնելու հաջորդ օրը նախաքննական մարմինը որոշում է կայացնում անձին որպես մեղադրյալ ներգրավելու մասին, 2018-ի օգոստոսից քննվող գործով չգիտես ինչու՝ 2021-ի փետրվարի 7-ին։ Արդեն ամսի 11-ին մեր փաստաբան-կոլեգաններից մեկը կապի է դուրս գալիս քննիչի հետ եւ հայտնում է, որ Տարոն Մարգարյանը գտնվում է ՌԴ-ում, ինքը հնարավորինս շուտ գալու է Հայաստան, դա էլ փետրվարի 13-ն էր՝ առաջին չվերթով։ Այդ օրը պարոն Մարգարյանը եկավ 23։ 00-ին եւ 00։ 40-ին ներկայացանք քննիչի մոտ։ Ու ի զարմանս մեզ՝ նշեց, որ որոշում է կայացվել հետախուզում հայտարարելու վերաբերյալ։ Այսինքն՝ ամսի 11-ին մարդը խոսում, պայմանավորվում է մեր հետ ու այդ նույն օրը հետախուզում է հայտարարում։ 

-Հիմա հետախուզումը վերացրե՞լ է։

-Բնականաբար, քննիչը պիտի վերացնի, որ վերացրած չլիներ, պարոն Մարգարյանին ոստիկանները պետք է հետապնդեին, բնականաբար, նման բան չի եղել։

-Գործով անցնում է նաեւ կառավարությանն առընթեր պետգույքի կառավարման վարչության նախկին պետ Արման Սահակյանը, նույն մեղադրանքը նաեւ նրան է առաջադրված, ի՞նչ առնչություն ունի։

-Չգիտեմ, նշված է, որ պետգույքի կառավարման վարչության պետն է եղել Արման Սահակյանը եւ վերջ։ Մոտավորապես՝ այսպես կարող ենք եզրակացնել․ քաղաքապետարանի հետ կապ ունեցող ինչ հիմնարկ-ձեռնարկությունում, շինությունում, օրինակ, հրդեհ լիներ կամ մեկն ընկներ, ոտքը ջարդեր, դուրս է գալիս, որ մեղավորը Տարոն Մարգարյանն է, ենթադրություն է էլի։ Հանցանքը պետք է ունենա ժամանակահատված՝ հանցանքի կատարման պահ, հետեւանքի առաջացման պահ, կարեւոր հարց կա, ես որպես փաստաբան չեմ կարողանում ֆիքսել՝ այս մարդը ե՞րբ է սկսել իր լիազորությունները չարաշահել, այդ չարաշահումը ե՞րբ է ավարտվել ու ե՞րբ է առաջացել հետեւանքը, այսինքն՝ սա էլ է անորոշ։

-Այս դեպքում վաղեմության ժամկետ կա՞ եւ ինչքա՞ն է։

-Ըստ էության՝ վաղեմության ժամկետ կա, սա ծանր հանցագործություն է համարվում, որի վաղեմության ժամկետը երկար է։ Եթե մենք ունենայինք անգամ վաղեմության ժամկետ, համաներում կամ ինչ-որ հիմք լիներ, սակայն մենք նրա կողմնակիցն ենք, որ պարոն Մարգարյանի վերաբերյալ քրեական հետապնդումը դադարեցվի միմիայն արդարացնող հիմքով։ 

-Ըստ Ձեզ՝ ինչո՞ւ հիմա այս գործի մասին հաղորդագրություն տարածվեց, տեսնո՞ւմ եք քաղաքական ենթատեքստ, որ հնարավոր է այս փուլում որոշակի հարցեր է ուզում լուծել իշխանությունը։

-Եթե լիներ ստանդարտ գործ, լիներ մեղադրանքի որոշակիություն,  լինեին գործողություններ, որոնք ունենային տրամաբանություն, ես նույնիսկ այսքան չէի խոսի, կասեի՝ թող մարդիկ հանգիստ իրենց քննությունն անեն, բայց իմ մոտ ողջամիտ տպավորություն է ստեղծվում, որ այս մարդուն որպես մեղադրյալ են ներգրավել, որ ուղղակի Հայաստան չգա՝ հետախուզում կհայտարարեին, կհրապարակեին, որ Տարոն Մարգարյանը որպես մեղադրյալ է ներգրավվել եւ փախած է երկրից։ Բայց իրենց նախատեսածը չստացվեց, պարոն Մարգարյանը փախնելով աչքի չի ընկել, ինքը միշտ եղել է իր երկրում։

Այս թեմայով Տարոն Մարգարյանի, Արման Սահակյանի, ևս 7 անձի գործն ուղարկվել է դատարան Քարոզարշավը ցույց տվեց, որ հայ ժողովուրդը պատիվ ունի. Տարոն Մարգարյանը քվեարկեց Ես քեզ ընտրելու եմ․ քաղաքացին՝ Տարոն Մարգարյանին «Հրապարակ». ՀՀԿ-«Հայրենիք» դաշինքի ցուցակի 2-րդ տեղում Տարոն Մարգարյանն է Տարոն Մարգարյանը Բաղրամյան պողոտայում է (լուսանկար) Պարոն Մարգարյանն այս ֆարսին վերաբերում է հումորով. փաստաբան «Թավշյա» պաշտոնյաների PR-ը՝ նախորդների ձեռքբերումների հաշվին. մաս 4-րդ «Ժամանակ». Որն է «Երևան»-ի ղեկավարին պատասխանատվության չենթարկելու գաղտնիքը.