Աշխատակիցները տնօրենին պաշտպանում են թաղապետից. ինչ է կատարվում թիվ 133 մանկապարտեզում
ՀասարակությունԵրևանի թիվ 133 մանկապարտեզի աշխատակիցները այսօր՝ մարտի 29-ին, բողոքի ակցիա էին իրականացնում: Պատճառն այն էր, որ Շենգավիթ վարչական շրջանի թաղապետարանի աշխատակիցները ցանկանում են աշխատանքից ազատել մանկապարտեզի տնօրեն Ժաննա Մանուկյանին, որը տնօրինում է դեկտեմբերից:
«Թաղապետարանի աշխատակիցները մտան մանկապարտեզ և անօրինական կերպով հեռացրին մեր տնօրենին՝ առանց քաղաքապետարանի իրավասության և թույլտվության: Պատճառաբանում են, որ տնօրենը երեխաներին անօրինական է ընդունել մանկապարտեզ, բայց տնօրենն առաջնորդվել է Առողջապահության նախարարի հրամանով՝ եթե ծնողը չի վերադարձել Արցախյան պատերազմից, եթե ունի հաշմանդամության կարգ, եթե ծնողը աշխատում է մեր մանկապարտեզում, եթե անհնար է աշխատանքը հեռավար տարբերակով իրականացնել և, եթե երկուսն էլ աշխատում են: Դրանով առաջնորդվելով՝ մեր տնօրենը՝ Ժաննա Մանուկյանը, 12 երեխայի ընդունեց, իսկ իրենք ասում են՝ «լեվի» երեխա ես պահել: Ընդունելուց 4 օր անց, թաղապետարանից մեզ ուղարկեցին շրջաբերական»,- ԼՈՒՐԵՐ.com-ի հետ զրույցում պատմեց մանկապարտեզի աշխատակիցը:
Սակայն, ինչպես աշխատակիցներն են նշում, երեխաներին մանկապարտեզ են ընդունել հենց թաղապետարանի՝ Կրթության, մշակույթի և սպորտի բաժնի աշխատակցի հրամանով. «Մինչ շրջաբերականն ուղարկելը՝ տիկին Մանուկյանին զանգել է թաղապետարանի աշխատակից Հրանտը, ասել է՝ ընդունի՛ր, մատյանում գրանցի՛ր երեխաներին, մինչև տեսնենք՝ ծրագիրը ինչ է լինում: Ուրբաթ օրը տիկին Մանուկյանը զանգում է ծնողներին և ասում, որ իրենց երեխաներրը արդեն պիտի հաճախեն մանկապարտեզ: Դրանից հետո թաղապետարանից ասում են՝ հրամանը տվել ես, չգիտե՞ս երկրորդը տալու ձևը»,- մեզ հետ զրույցում ասաց մանկապարտեզի հաշվետար- գանձապահ Ալբինա Դավթյանը:
Աշխատակիցների խոսքով՝ տնօրենը եղել է քաղաքապետարանում, նրան ասել են՝ ԱՆ հրամանը ավելի մեծ իրավական ուժ ունի և թաղապետարանն իրավունք չունի՝ աշխատանքից ազատելու:
Սակայն թաղապետարանից հակադարձել են՝ ասելով, որ իրենք իրավունք ունեն՝ առանց քաղաքապետարանի թույլտվության, աշխատանքից ազատելու տնօրենին. «Իրենք ազատում են մեկին, ով պահում է 3 անչափահաս երեխայի, ում ամուսինը կամավոր մեկնել է Արցախ, և 6 ամիս է՝ անհետ կորած է. ի՞նչ խղճով: Շենգավիթ վարչական շրջանի Կրթության, մշակույթի և սպորտի բաժնի պետը՝ Հասմիկ Ասլանյանը, կանչել է մեր տնօրենին և ասել՝ մեր անձնական-գործնական հարաբերությունները չստացվեցին, Դուք միևնույն է՝ չեք աշխատելու որպես տնօրեն, Ձեր ազատման հրամանը տրվել է: Այս խոսակցության ձայնագրությունն ունենք, նաև այն, որ Հրանտն ասում է՝ ես եմ ասել՝ ընդունեք այդ երեխաներին: Հիմա մեզ ասում են՝ ասել ենք ուրիշ բան, Դուք հասկացել եք մեկ այլ բան: Իրենք թքած ունեն օրենքի վրա էլ, քաղաքապետարանի վրա էլ, կնոջ կարգավիճակի վրա էլ»,- ասաց մանկապարտեզի դաստիարակ Աննա Մանուկյանը:
Աշխատակիցներն ասում են, որ տնօրենին մեղադրում են նաև ամեն ամիս երեխաներից գումար վերցնելու մեջ, սակայն, ինչպես նշում են, այդ մեղադրանքներն անհիմն են, նշում են նաև՝ պայքարելու են մինչև վերջ:
«Շենգավիթ վարչական շրջանի աշխատակիցները գալիս են ոչ թե մեզ ուղղություն ցույց տալու, այլ՝ «բռնելու», որ ազատեն, իրենց ծանոթներին բերեն-նստեցնեն: Փաստ չունենք, բայց կատարվածը դրան է տանում, ի՞նչ է նշանակում՝ միևնույն է՝ այդտեղ չես աշխատելու և այն մարդուն են ասում, ում ամուսինը անհետ կորած է, դա անելու բա՞ն է»,- ընդգծեց մանկապարտեզի դաստիարակը:
Մանկապարտեզում վստահ են՝ տնօրենի թեկնածուն հենց թաղապետարանի աշխատակիցներից մեկն է:
«Թաղապետարանից կանչել են տիկին Մանուկյանին, խնդրել են, որ գնա ուրիշ մանկապարտեզում աշխատի՝ որպես տնօրեն, պատճառաբանելով, որ տվյալ տնօրենը վատ է աշխատում: Ասել են՝ այնտեղ կարգի կբերես, քանի որ դու լավ տնօրեն ես, այստեղ որոշ ժամանակով կհանձնենք որևէ մեկին: Մեկ ամիս հետո, տիկին Մանուկյանը դարձավ հանցագործ, երեխա պահող, գումար աշխատող, սնունդ գողացող՝ ըստ իրենց նկարագրության ու այս ամենը՝ առանց ապացույցի: Տիկին Մանուկյանն էլ ասել է՝ ես հոգեպես այն վիճակում չեմ, որ գնամ օտար միջավայրում աշխատեմ: Այդ ժամանակ տեսան, որ չեն կարողանում հանել, սկսեցին «գործ սարքել»»,- նկատեց Աննա Մանուկյանը:
Աշխատակիցներն իրենց պահանջներում հաստատակամ են՝ եթե այս հարցը չլուծվի՝ վաղվանից գործադուլ են հայտարարելու, դարպասները չեն բացելու, երեխա չեն ընդունելու և վստահ են, որ ծնողները ևս միանալու են իրենց պայքարին: Նրանք ընդգծում են՝ տնօրենի աշխատանքում որևէ թերություն չեն նկատել:
Մանրամասները՝ տեսանյութում:
Արփինե Հակոբյան