«ԼՀԿ»-ի և «ԲՀԿ»-ի հետ փորձել ենք «մաքսիմալ» այնքան խորհրդակցություններ անցկացնել, որքան անհրաժեշտ է. Մակունց
ՔաղաքականՄենք արտահերթ նիստի ժամանակ ներկայացրինք, որ, ըստ էության, ընտրական օրենսգրքի նոր փոփոխությունները բաժանել ենք երկու մասի, մի մասը, որը վերաբերում է միայն համամասնական ընտրակարգին, մենք արդեն ԱԺ-ի լիագումար նիստերի ընթացքում 24-ժամյա ռեժիմով ընդունեցինք, որն այս պահին արդեն նախագահի դատին է հանձնված և առաջիկայում կտեսնենք, թե ինչ տեղի կունենա համամասնականի առնչությամբ։ Այս մասին այսօր՝ ապրիլի 5-ին, ԱԺ-ում լրագրողների հետ ճեպազրույցի ժամանակ ասաց Լիլիթ Մակունցը:
«Մենք այս ընթացքում նաև ունեցել ենք խորհրդակցություններ մեր մասնագիտացված միջազգային կառույցների հետ և իրազեկել ենք նաև մեր այդ անելիքի կապակցությամբ։ Ինչ վերաբերում է երկրորդ փաթեթին՝ երկրորդ հատվածին, ապա, երբ կունենանք Վենետիկի հանձնաժողովի պաշտոնական դիտարկումը այն ժամանակ նաև, այո’, կքննարկենք այդ հարցը, թե որ դրույթները կընդունվեն առաջիկա արտահերթ խորհրդարանական ընտրությունների համար և որոնք կհետաձգվեն․ դա արդեն խորհրդարանում կքննարկվի և կորոշենք»,-ասաց Մակունցը:
Հարցին՝ նախնական որևէ պատկերացում կա՞ իմքայլականների թիմի ներսում, թե որ դրույթների հնարավոր փոփոխությունը կարող է լինել մինչև արտահերթ ընտրություններ, Լիլիթ Մակունցը պատասխանեց․
«Խորհրդարանական գործընկերների հետ, նկատի ունեմ, «Բարգավաճ Հայաստան» և «Լուսավոր Հայաստան» խմբակցությունների հետ մենք փորձել ենք «մաքսիմալ» այնքան խորհրդակցություններ անցկացնել, որքան անհրաժեշտ է, որպեսզի հանգենք ընդհանուր եզրահանգման առնվազն մեկ դրույթի՝ համամասնական ընտրակարգի շուրջ։ «Բարգավաճ Հայաստան» կուսակցությունը գերադասեց ձեռնպահ մնալ այս պահին քվեարկությանը մասնակցելուց։ Լսել ենք նաև «Լուսավոր Հայաստան» խմբակցության տեսակետը․ ինչևէ ես կարծում եմ բավականաչափ քննարկվել է չարժե հարգենք ուղղակի խմբակցությունների մոտեցումները և արձանագրեմ ևս մեկ անգամ, որ դա եղել է մեր քաղաքական հանձնառությունը՝ համամասնական ընտրակարգին անցնելը»։