Իրավիճակը հասել էր մի կետի, որ Հայաստանը կա՛մ պետք է ընդուներ անընդունելի բաներ, կա՛մ լինելու էր պատերազմ․ Ռուբեն Ռուբինյան

ԱԺ «Իմ քայլը» խմբակցության պատգամավոր Ռուբեն Ռուբինյանն «Ազատություն» ռադիոկայանով հեռարձակվով «Ֆեյսբուքյան ասուլիս» հաղորդաշարի ժամանակ հայտարարել է, որ համամիտ չէ քաղաքագետների գնահատականներին, թե «Քաղաքացիական պայմանագրի» վերընտրվելու դեպքում քաղաքացիական պատերազմի սկիզբ կդրվի, քանի որ վարչապետի պաշտոնակատարից պատերազմից հետո մեծ հիասթափություն կա:

«Այդ տրամաբանությամբ ցանկացած ընտրությունից հետո ցանկացած երկրում պիտի պատերազմ սկսվի, որովհետև մի մասը պիտի քվեարկած լինի հաղթող ուժի օգտին, մյուսը` ոչ: Մեր երկրում կան ուժեր, որոնք ամեն առիթով նման խոսակցություններ են բացում», - ասել է նա: Որպես օրինակ պատգամավորը հիշեցրեց ԶՈՒ գլխավոր շտաբի նախկին պետ Օնիկ Գասպարյանի և այլ զինվորականների հայտարարությունը` վարչապետի հրաժարականի պահանջով:

«Այս խոսակցություններն ուռճացված են, որպեսզի լինի քաղաքացիական պատերազմ, պետք է լինեն երկու կամ ավելի քաղաքացիների խմբեր, որոնք պատրաստ են իրար արյուն թափել, ես կարծում եմ, որ մեր ժողովուրդը իմաստուն է այդ առումով և երբևէ թույլ չի տալու, որպեսզի այդպիսի բան լինի: Ատելության մթնոլորտ կա իշխանությունից զրկված որոշակի կրիմինալ խմբակների մոտ ժողովրդի հանդեպ և ժողովրդի որոշակի մասի կողմից նրանց հանդեպ, բայց ընդհանուր առմամբ մենք ունենք համերաշխ հասարակություն, որի անդամները կարող են լինել տարբեր ուժերի համակիրներ, բայց սա չի բերելու բախման»,- ասել է Ռուբինյանը:

Իշխանական պատգամավորը նաև համամիտ չէ իրավապաշտպանների հետ, թե ատելության մթնոլորտը Հայաստանում երբեք այսքան բարձր չի եղել: Իրավապաշտպանները նշում են, որ ատելության մթնոլորտի սկիզբը դրեց իշխանությունը` սև ու սպիտակների բաժանելով:

«Մեր երկրում կան որոշակի խմբակներ, որոնք հիմնականում փոխկապակցված են նախկին իշխանության հետ, որոնք, այո, ատելությամբ են լցված ժողովրդի իշխանության հանդեպ, նկատի ունեմ ժողովրդի իշխանության հանդեպ ընդհանրապես, որ կարող են իրենք իշխել: Այս առումով ատելության մթնոլորտ կա»,- ասել է նա:

Անդրադառնալով պատերազմին՝ նա նկատել է, որ այս պատերազմում կարծեք թերագնահատվում է Ադրբեջանի գործոնը։ «Եթե մեր պնդումը հետևյալն է, որ մեր դիվանագիտությունն է տապալվել, դրա համար պատերազմ եղավ, ես կարծում եմ, որ դա ինչ–որ չափով մաքրում է Ադրբեջանին մեղքից։ Իրավիճակը հասել էր մի կետի, որ Հայաստանը կա՛մ պետք է ընդուներ անընդունելի բաներ, կա՛մ լինելու էր պատերազմ»,–ասաց նա։