Մենք հաղթանակը չենք կապիտալիզացրել, անցած տարիները մսխվել են. Էդմոն Մարուքյան

Բոլորս գիտենք, որ այս օրը միշտ նշվել է որպես Եռատոն՝ Հաղթանակի օրը, Շուշիի ազատագրման օրը եւ Արցախի բանակի հիմնադրման օրը: Այս մասին, այսօր՝ մայիսի 9-ին Հաղթանակ» զբոսայգում լրագրողների հետ զրույցում նշեց «Լուսավոր Հայաստան» խմբակցության ղեկավար Էդմոն Մարուքյանը:

«Ակնհայտ է, որ յուրքանչյուր հաղթանակ պետք է կապիտալիզացնել, դարձնել ուժեղ պետություն: Որքանո՞վ ենք դա կարողացել անել, կարծում եմ՝ այսօր այն օրն է, որ գիտակցում ենք, որ լավ չենք այս ուղղությամբ թե մեր պետությունը կառուցել, թե արժեւորել այդ հաղթանակները, թե մեր պետական ինստիտուտների հզորությունը: Այն մարտահրավերը, որ մեզ նետվեց 2020-ին, ցույց տվեց, որ մենք հաղթանակը չենք կապիտալիզացրել, անցած տարիները մսխվել են:

Պարզ է, որ այսօրը շատ տխուր օր է դարձել: Անցած տարի այստեղ այնքան մարդ կար, որ իրար հրում էին, բոլորն իրար շնորհավորում էին, հիմա էլ ենք շնորհավորում, բայց ոչ այդքան մարդ կա, ոչ տրամադրություն կա, ոչ էն հպարտությունը կա, կոտրված ենք բոլորս»,-ասաց նա:

Մարուքյանը նշեց, որ այսօրվանից սկսած պետք է ոտքի կանգնել. «1-0 էր, դարձել է 1-1, ու այդ 1-1-ը կարող է դառնալ 2-1, 3-1 հօգուտ մեզ, եթե կարողանանք ուժեղ պետություն կառուցել: Մենք կարող ենք ուժեղ պետություն կառուցել, 10 միլիոնանոց ազգ ենք, ունենք մի երկիր, որտեղ 2-3 մլն մարդ է ապրում»:

Դիտարկմանը, որ այս պարտության քաղաքական ու բարոյական պատասխանատվությունը կրում է օրվա իշխանությունը, Մարուքյանն արձագանքեց. «Ժողովուրդը թող այդ պատասխանատվությունը որոշի հունիսի 20-ի ընտրություններում: Ոչ ես եմ որոշում, ոչ դուք: Բարոյական է, բարոյական չի, պատասխանատու է, պատասխանատու չի, ես այսօր չեմ էլ ուզում անդրադառնալ այդ թեմաներին: Մեզ պետք է համախմբվել, պետք է Հայաստանը դարձնել 10 մլն հայ երկիրը: Մենք կարող ենք ոտքի կանգնել եւ շարժվել առաջ»:

Հարցին, թե հիմա մենք եռատո՞ն ենք նշում, Մարուքյանը դրական պատասխան տվեց. Այո, Եռատոն ենք նշում, վերջին հաշվով Շուշին ազատագրել ենք: Հիմա գրավել են Շուշին, բայց Եռատոնը ազատագրելու մասին է: Դա նշանակում է, որ էլի կարող ենք ազատագրել: Հիմա ի՞նչ է, մտածում ենք, որ չի եղե՞լ հաղթանակ, Շուշին չենք ազատագրե՞լ»: