Ալեքսանդր Սպենդիարյանի հիշատակի օրը՝ վարդատունկով

ՀՀ ԿԳՄՍ նախարարի տեղակալ Արա Խզմալյանը եւ Ա. Սպենդիարյանի տուն-թանգարանի տնօրեն Մարինե Օթարյանը նախարարության, թանգարանի աշխատակիցների, մտավորականների ու արվեստագետների  հետ Ալեքսանդր Սպենդիարյանի հիշատակի օրվա առթիվ ծաղիկներ են խոնարհել մեծանուն կոմպոզիտորի շիրիմին եւ խնկարկել հիշատակը:

ԿԳՄՍՆ-ից հայտնում են, որ Թանգարանի նախաձեռնությամբ նախարարի տեղակալը, անվանի մտավորականներն ու արվեստագետները նաեւ խորհրդանշական վարդեր են տնկել կոմպոզիտորի շիրիմի մոտ:

Թանգարանի տնօրեն Մարինե Օթարյանի խոսքով՝ Սպենդիարյանի հիշատակի օրը, որն ավանդաբար նշվում է մայիսի 7-ին, լավ առիթ է՝ եւս մեկ անգամ խոսելու եւ ներկայացնելու հայ երաժշտարվեստում այն մեծ ժառանգությունը, որը թողել է մեծանուն կոմպոզիտորը:

«1928 թվականի մայիսի 7-ին, երբ Ալեքսանդր Սպենդիարյանը կնքել է իր մահկանացուն, նրա մտերիմ ընկերոջ՝ ճարտարապետ Ալեքսանդր Թամանյանի առաջարկությամբ որոշվել է կոմպոզիտորի աճյունն ամփոփել կառուցվող Ժողովրդական տան, այժմ՝ Ա. Սպենդիարյանի անվան օպերայի եւ բալետի ազգային ակադեմիական  թատրոնի հարակից պուրակում: Թամանյանն անձամբ էր  խնամում եւ մշակում  ընկերոջ շիրիմի մոտ աճեցրած վարդերը, հոգ էր տանում, որ դրանք միշտ դալար մնան: Որոշեցինք ժամանակի մտավորականության, մեր հասարակության միջոցով վերականգնել այդ ազնվագույն ավանդույթն ու կոմպոզիտորի շիրիմի մոտ իրականացնել վարդատունկ»,- նշել է թանգարանի տնօրենը:

Անդրադառնալով Սպենդիարյանի 150-ամյակին նվիրված միջոցառումներին՝ Մարինե Օթարյանը տեղեկացրել է, որ նախատեսվում են համերգային ծրագրեր,  գիտաժողովներ եւ հրատարակություններ: Ծրագրեր կիրականացվեն նաեւ կոմպոզիտորի ծննդավայրում՝ Ղրիմում, Թբիլիսիում՝ Թումանյանի տուն-թանգարանի հետ, ինչպես նաեւ Մոսկվայում եւ Լոնդոնում:

«ՅՈՒՆԵՍԿՕ-ի հովանու ներքո Ալեքսանդր Սպենդիարյանի տուն-թանգարանը պատրաստում է պատկերագիրք եւ ձայնասկավառակ: Կոմպոզիտորի ստեղծագործությունների ձայնագրությունը կիրականացնի Հայաստանի պետական սիմֆոնիկ նվագախումբը, իսկ պատկերագրքի պատրաստումը՝ կոմպոզիտորի տուն-թանգարանի գիտական կազմը: Արդեն պատրաստ է Գեորգի Բուդաղյանի «Ալմաստի» գործիքավորման մասին գիրքը, որը սպասում է իր գինեձոնին: Կոմպոզիտորի հոբելյանին նվիրված՝ առաջիկայում Հայաստանի պետական սիմֆոնիկ եւ Հայաստանի ազգային ֆիլհարմոնիկ նվագախմբերի համերգներն են»,- տեղեկացրել է Մարինե Օթարյանը եւ անդրադարձել մայիսի 18-ին «Թանգարանային գիշեր» ծրագրի շրջանակում կոմպոզիտորի տուն-թանգարանի պուրակում նախատեսվող միջոցառումներին:

«Ալեքսանդր Սպենդիարյանն աչքի էր ընկնում հղկվածությամբ, իմացությամբ եւ մտերիմների այնպիսի շրջանակով, որոնցով հպարտանում էին բոլորը: Երեւանում նա իր առաջին քայլերն արեց՝ որպես հայ մեծ դասական, ստեղծեց «Երեւանյան էտյուդները», որը պետք է կատարեր սիմֆոնիկ նվագախումբը: Այն նվագախմբի կատարմամբ ներկայացնելը մեծ իրադարձություն էր»,- պատմել է Տիգրան Մանսուրյանը եւ հավելել, որ պարբերաբար այցելում է Սպենդիարյանի շիրիմին:

Միջոցառման շրջանակում Ա. Սպենդիարյանի անվան օպերայի եւ բալետի ազգային ակադեմիական թատրոնի նվագախումբն ու երգչախումբը կոմպոզիտորի արձանի մոտ հետաքրքիր մեկնաբանությամբ կատարել են նրա ստեղծագործությունները:

Այս թեմայով Թալանել են փաստաբան Ալեքսանդր Կոչուբաևի ավտոմեքենան․ Էրիկ Ալեքսանյան Գլխարկ, դպրոց, ցնցուղ․ Հայաստանի իշխանությունները բարձրացնու՞մ են իրենց վարկանիշը. Ալեքսանդր Իսկանդարյան (տեսանյութ) Սերբիայի նախագահ, Ռուսաստանի լավ բարեկամ Ալեքսանդր Վուչիչի հետ ջերմ ու բովանդակալից հանդիպումով բացեցի միջազգային շփումների նոր շարքը. Մհեր Ավետիսյան «Մոնթե Մելքոնյանի անվան ռազմամարզական վարժարան»-ի տնօրենի պաշտոնակատար է նշանակվել Ալեքսանդր Մանուչարյանը Ալեքսանդր Պետրակովը՝ Հայաստանի 2023 թ. լավագույն մարզիչ Ալեքսանդր Պետրակովի հետխաղային ասուլիսը (տեսանյութ) Ալեքսանդր Պետրակովը հրապարակել է Հայաստանի ազգային հավաքական հրավիրված ֆուտբոլիստների ցանկը Քերոբյանը Աբու Դաբիում Զիյադ Ալեքսանդր Հայեքի հետ քննարկել է ՀՀ-ում պետություն-մասնավոր գործընկերության հարցերը Եթե պարտվենք Թուրքիային, կզրկվենք ուղեգրի համար հետագա պայքարից․ Ալեքսանդր Պետրակով ՀՀ նախագահը դեսպաններից 3-ին հետ է կանչել և նոր նշանակումներ արել. Հետ է կանչվել նաեւ Ալեքսանդր Արզումանյանը