Գագիկ Բեգլարյանն ազատ է արձակվել 50 միլիոն դրամ գրավի դիմաց

Երևանի նախկին քաղաքապետ Գագիկ Բեգլարյանը ազատ է արձակվել 50 միլիոն դրամ գրավի դիմաց։ Այս մասին ԼՈՒՐԵՐ.com-ի հետ զրույցում հայտնեց ՀՀ գլխավոր դատախազի խորհրդական Գոռ Աբրահամյանը:

«Պաշտոնեական դիրքն օգտագործելով առանձնապես խոշոր չափերով գույք վատնելու, ինչպես նաև պաշտոնեական դիրքը ծառայության շահերին հակառակ օգտագործելու, ծանր հետևանքներ առաջացնելու համար ՀՀ քրեական օրենսգրքի 308-րդ հոդվածի 2-րդ մասով և 179-րդ հոդվածի 3-րդ մասի 1-ին կետով նախատեսված հանցագործությունների կատարման մեջ մեղադրվող, հետախուզման մեջ գտնվող Գագիկ Բեգլարյանը սույն թվականի մայիսի 17-ին Մոսկվա-Երևան չվերթի ինքնաթիռով ժամանել է ՀՀ, ինքնակամ ներկայացել քրեական վարույթն իրականացնող մարմին, բացի այդ ՀՀ դատախազության դեպոզիտ է մուծվել առաջադրված մեղադրանքի համաձայն՝ պետության պատճառված վնասին համարժեք գումար: Հաշվի առնելով նշված հանգամանքները՝ քրեական գործով նախաքննության օրինականության նկատմամբ հսկողություն իրականացնող դատախազի կողմից որոշում է կայացվել մեղադրյալ Գագիկ Բեգլարյանի նկատմամբ ընտրված խափանման միջոց կալանավորումը 50.000.000 (հիսուն միլիոն) ՀՀ դրամի չափով գրավով փոխելու մասին», - նշեց նա:

Հիշեցնենք, որ Գագիկ Բեգլարյանի նկատմամբ հետախուզում էր հայտարարվել դեռևս 2020-ի մարտին: Նա մեղադրվում է պետությանը պատկանող առանձնապես խոշոր չափերով՝ ավելի քան 230 միլիոն դրամ արժողությամբ անշարժ գույք հափշտակելու համար։ 

Այս թեմայով «Հրապարակ». Գագիկ Բեգլարյանին հրավիրել են դատախազություն Գագիկ Բեգլարյանը բերման չի ենթարկվել, այլ ինքնակամ է ներկայացել. փաստաբան Հակոբ Արշակյանի PR-ը՝ նախորդների ձեռբերումների հաշվին