Ոչինչ չեմ բացառում. Շուռնուխի համայնքապետը՝ գյուղը ադրբեջանցիներին հանձնելու մասին

Ոչ մի կոնտակտ չկա ադրբեջանցի զինվորների հետ, խելոք սսկված են իրենց տեղերում: Այս մասին ԼՈՒՐԵՐ.com-ի հետ զրույցում ասաց Շուռնուխ համայնքի ղեկավար Հակոբ Արշակյանը:

Անդրադառնալով Շուռնուխը Ադրբեջանին հանձնելու խոսակցություններին՝ Հակոբ Արշակյանը պատասխանեց. «Անկեղծ ասած, ես այլևս ոչնչից չեմ զարմանում ու ոչինչ չեմ բացառում, ամեն ինչ հնարավոր է»,- ասաց համայնքի ղեկավարը՝ ընդգծելով, որ ամեն դեպքում Շուռնուխը ՀՀ տարածք է. «Երբևէ այն չի գրավվել ադրբեջանցիների կողմից, ի սկզբանե Շուռնուխը եղել է մերը: Միայն թե, չգիտես ինչու, GPS-ով գյուղը կիսել են ու կեսը տվել նրանց»,- նշեց նա:

Ըստ վերջինիս խոսքերի՝ ինչ էլ որ լինի իրենց տները չեն լքելու. «Մենք մեկ անգամ արդեն սխալվել ենք՝ լքելով մեր տները, բայց այս անգամ նույն սխալը այլևս չենք կրկնի, այսինքն՝ ոչ մի կերպ մեր տներից դուրս չենք գալու, մնալու ենք, գյուղը ամբողջությամբ պահենք մեր հսկողության տակ»,- ասաց Հակոբ Արշակյանը:

Մեր այն հարցին, թե կան արդյոք ընտանիքներ, որոնք, իրենց անվտանգությունից ելնելով, լքել են տները, համայնքի ղեկավարը պատասխանեց. «Այդպիսի ընտանիքներ չկան, սակայն նրանք, որոնք կորցրել են իրենց տները GPS-ով սահմանազատման ժամանակ, ստիպված լքել են գյուղը և բնակվում են Գորիսում»,- ասաց Հակոբ Արշակյանը:

Զվարթ Պետրոսյան