Վարչական ռեսուրս, լեգիտիմ կաշառք. Փաշինյանը գործի է դնում ողջ արսենալը

Վերլուծական 5 Հունիս, 2021 20:27

Ընդդիմադիր քաղաքական գործիչները և քաղհասարակության ներկայացուցիչները տարակուսած են՝ Նիկոլ Փաշինյանը Հանրապետականների ոճով՝ վարչական ռեսուրսի կիրառմամբ նախընտրական քարոզարշավ է իրականացնում, ինչը կոշտ քննադատում էր հենց Նիկոլ Փաշինյանը: Դեռ քարոզարշավը պաշտոնապես չի մեկնարկել, սակայն, Փաշինյանն արդեն հասցրել է շրջել շուրջ մեկ տասնյակ համայնքներում և համայնքային խնդիրների լուծման վերաբերյալ խոստումներ տալ: Նիկոլ Փաշինյանը քարոզարշավ անելով թեև օրենք չի խախտում, բայց վարչապետը չպետք է համատեղի աշխատանքային պարտականություններն ու նախընտրական քարոզչությունը, քանի որ դա ոչ մրցակցային պայմաններ է ստեղծում ընդդիմադիր թեկնածուների համար:

ԵԱՀԿ/ ԺՀՄԻԳԻ և Վենետիկի հանձնաժողովի կողմից 2016 թվականին հաստատված «Ընտրական գործընթացների ընթացքում վարչական ռեսուրսի չարաշահման արձագանքման և կանխարգելման համատեղ ցուցումների» համաձայն՝ «վարչական ռեսուրսի չարաշահումը» որոշակի կուսակցությունների կամ թեկնածուների կողմից իրենց պաշտոնեական դիրքն օգտագործելու միջոցով անհիմն առավելություն ստանալն է՝ ընտրությունների արդյունքների վրա ազդելու նպատակով»:

Փաշինյանը իրականացնում է նախընտրական քարոզչություն աշխատանքային ժամին` պաշտոնական պարտականությունների կատարում հանդիսացող աշխատանքային այցի շրջանակներում, ինստիտուցիոնալ բոլոր ռեսուրսների օգտագործմամբ: Բացի այդ, ակնհայտ է, որ վարչապետի հետ, այսպես կոչված, հանդիպումների կազմակերպիչները՝ վարչական շրջանների ղեկավարները և մարզպետները, տեղերում են կիրառում վարչական լծակներ, փորձելով հնարավորինս շատ մարդ հավաքել Փաշինյանի համար:

Վարչական ռեսուրսների կիրառումից զատ Փաշինյանն ու թիմը արդեն իսկ սկսել են օրինական կաշառք բաժանել: Կառավարությունը օրերս որոշում է կայացրել հանրապետության 9 մարզերին պետական բյուջեից հատկացրեց 1 միլիարդ 200 միլիոն դրամ գումար, սակայն ընդունված որոշման մեջ հստակեցված չէր, թե ովքեր են լինելու հատկացված գումարի շահառուները և ինչու: Մինչդեռ այս շաբաթ գործադիրը դարձյալ գումար է հատկացել ՀՀ մարզերին, սակայն, ի տարբերություն նախորդ ընդունած որոշման, այս անգամ հստակ գրել են, թե հատկացված գումարի շահառուներն ովքեր են։ Եվ այսպես, մայիսի 13-ի նիստում Կառավարությունն ընդունեց պետական բյուջեի մասին օրենքում հերթական փոփոխությունն ու լրացումը, ըստ այդմ՝ Սահմանամերձ համայնքների բնակիչների կենսապայմանների բարելավման նպատակով ՀՀ կառավարության կողմից 2014 թվականի դեկտեմբերի 18-ին ընդունված որոշման մեջ և ֆինանսական աջակցություն ստացող համայնքների բնակավայրերի թիվն ավելացվել է 43-ով՝ 7 համայնք՝ Սյունիքի և Գեղարքունիքի մարզերում։ Կառավարությունն ավելացված բնակավայրերի համայնքների բնակիչներին բնական գազի, էլեկտրաէներգիայի, ոռոգման ջրի սակագնի մասնակի ու գույքահարկի և հողի հարկի փոխհատուցում է տրամադրելու, ինչի համար պահուստային ֆոնդից հատկացրել է 400,205.8 հազար դրամ։

Փաշինյանը հասկանում է, որ տանուլ տված պատերազմից և կապիտուլյացիոն խայտառակ ակտից հետո արդար մրցապայքարում վերարտադրվելու շանսերը մոտ են զրոյի, հետևաբար կիրառում է ձեռքի տակ եղած ողջ արսենալը` իշխանությունը պահելու համար...