Հայաստանի և Ադրբեջանի միջև պատերազմն անհնար է. Լևոն Տեր–Պետրոսյան
ՀՀ առաջին նախագահ, «Հայ ազգային կոնգրեսի» վարչապետի թեկնածու Լևոն Տեր–Պետրոսյանը «Հանրային հեռուստաընկերությանը» տված հարցազրույցում հայտարարեց, որ անհնար է Հայաստանի և Ադրբեջանի միջև պատերազմը։
«Ալիևից ոչ մի վտանգ չկա` խաղաղություն է տիրում, ռուսական զորքերը կանգնած են և պատերազմն անհնար է։ Սակայն ընթացը պետք է լինի Թուրքիայի և Ադրբեջանի հետ համաձայնության գալը։ Հավերժ թշնամիներ չեն կարող լինել 2 հարևանները` մենք մեր գոյությունն ենք վտանգում»,- ասաց Տեր-Պետրոսյանը։
Նրա խոսքով՝ դա հնարավոր կլինի այն ժամանակ, երբ որևէ պետություն, կառույց լուծի Ղարաբաղյան հիմնահարցը։ «Չգիտեմ ինչպես կլուծվի հարցը։ Մեզնից դա այլևս կախված չէ։ Վերջացավ։ Մի՛ սպասեք, որ որևէ հայ կարող է ասել՝ ես կարող եմ լուծել Ղարաբաղի հարցը։ Չկա այդպիսի բան։ Նման բան գոյություն չունի, սա ցնորք է, զառանցանք է»,- ասաց նա։
Անդրադառնալով հայտարարություններին, ըստ որոնց, քանի որ Ռուսաստանն իր պարտականությունները մեր առջև չկատարեց, մենք պետք է համագործակցենք Արևմուտքի հետ` Տեր-Պետրոսյանն ասաց. «Բացարձակապես պետականությունից գաղափար չունեցող մարդկանց խոսքեր են։ Անեն այդ բանը, ավելի են խորացնելու առանց այդ էլ արդեն մեր ծանր վիճակը։ Դրանից ոչ մի լավ բան չսպասեք»: