«Սենսացիոն բացահայտումներ» խոստացած պաշտոնյաները. պոպուլի՞զմ, թե՞ պայմանավորվածություններ

Հեղափոխությունից անմիջապես հետո նորաթուխ թավշյա պաշտոնյաները, մեկը մյուսին հերթ չզիջելով, ասուլիսներ էին կազմակերպում և հայտարարում իրենց վստահված ոլորտներում ֆինանսական աուդիտ անցկացնելու մտադրության մասին, խոստանում էին իրենց նախորդների՝ միլիարդների հասնող չարաշահումների բացահայտումներ անել: Դիցուք՝ Ազգային ժողովը բանակցություններ էր սկսել Համաշխարհային 4 ամենախոշոր եւ ամենահեղինակավոր աուդիտորական ընկերությունների (Big 4) հետ ՀՀ Ազգային Ժողովի 2017-2018 ֆինանսական տարվա ֆինանսական աուդիտի իրականացման նպատակով։ Երեք տարի անց հանրության համար հասկանալի չէ՝ ի վերջո ինչ արդյունք է տվել տվյալ աուդիտը, չարաշահումներ եղե՞լ են, թե՞ ոչ:

Կրթության և գիտության նախկին նախարար Արայիկ Հարությունյանը աուդիտ էր սկսել Այբում:

Նույն Արայիկ Հարությունյանը աուդիտ էր պատվիրել Հայաստանի երիտասարդական հիմնադրամում, սակայն, երեք տարի անց այս աուդիտից ևս որևէ տեղեկություն չկա, ինչը, մեղմ ասած, տարակուսելի է: Արայիկ Հարությունյանը նշում էր, որ տարօրինակ է, որ հիմնադրամի որևէ տնօրեն մեկ օրում կարողացել է ստորագրել և վերցնել 320 մլն դրամ: Փաստորեն, կամ այլևս տարօրինակ չէ, կամ ստուգումներն արդյունք պարզապես չեն տվել: Պարզ չէ՝ վերը նշված 320 միլիոն դրամը վերականգնվե՞լ է  բյուջե, թե ոչ:

Սփյուռքի նախկին նախարար Մխիթար Հայրապետյանը իր նախորդի՝ Հրանուշ Հակոբյանի սարսափազդու չարաշահումներն էր պատրաստվում բացահայտել՝ աուդիտ անցկացնելով սփյուռքի նախարարությունում: Քանի որ նախարարությունը այլևս չկա՝ հանրությանը այդպես էլ մութ մնաց, թե ի վերջո այդ ինչ սարսափելի չարաշահումներ և կոռուպցիոն սխեմաներ էին գործարկվում սույն նախարարությունում Հակոբյանի կառավարման տարիներին:

ՀՀ բարձր տեխնոլոգիական արդյունաբերության նախարարությունում, օրինակ, 2018 թ.  ներքին աուդիտի բաժնի կողմից 5 հաստատությունում կատարվել է աուդիտ, որի համար բաժնի աշխատակիցները ստացել են 8 471 520 ՀՀ դրամ զուտ աշխատավարձ, ևս 274 400 դրամ՝ որպես ներքին գործուղման ծախսի փոխհատուցում: Սակայն հայտնի չէ՝ ինչ խախտումներ են հայտնաբերվել:

ՊՎԾ-ն աուդիտ էր անցկացնում «Գր. Լուսավորիչ» ԲԿ-ում, որի տնօրենը Վատիկանում ՀՀ նախկին դեսպան Միքայել Մինասյանի հայրն էր: ՊՎԾ-ն, սակայն, մինչ օրս, ասել է թե՝ երեք տարի անց, հանրությանը չի ներկայացրել այդ աուդիտի արդյունքները:

Hayeli,am-ը գրել էր, որ ընդամենը մի քանի ամիս քաղաքապետարանի ներքին աուդիտի բաժնի պետի պաշտոնակատար աշխատած Սամվել Եղիազարյանը, աուդիտի արդյունքում մի շարք չարաշահումներ էր հայտնաբերել և հանձնել է «Իմ քայլը» խմբակցությանը, որ նրանք որոշեն ինչ անել՝ իրենց նշանակած քաղաքապետի թույլ տված խախտումների մասով։ Բնականաբար՝ ոչ մի հետեւանք դա չի ունեցել։ Եղիազարյանը ստիպված է եղել իր թղթապանակը հանձնել ոստիկանություն՝ 6-րդ վարչություն, սակայն քանի որ ոստիկանապետի ժամանակավոր պաշտոնակատար Արման Սարգսյանը Մարությանի մտերիմ ընկերն է, գործը «ջրվել» է։ Դրանից հետո էլ եղել է կանխատեսելին․ աուդիտի պետի պաշտոնի համար մրցույթ է հայտարարվել, որին Եղիազարյանը չի մասնակցել։ Պետ է ընտրվել ու նշանակվել Նիկոլ Փաշինյանի համերկրացի՝ իջեւանցի Արթուր Վարդանյանը, որը, ինչպես քաղաքապետարանի շատ աշխատակիցներ, նախկինում աշխատել է ոստիկանությունում։

2018-ին Կոտայքի մարզպետարանի կողմից Հրազդանի քաղաքապետարանում իրականացված հսկողության արդյունքում ըստ մարզպետարանի կայքի՝ արձանագրվել էին մի շարք թերություններ և իրավախախտումներ, որոնց վերաբերյալ 2018թ. օգոստոսի 13-ին Կոտայքի մարզպետ Ռոմանոս Պետրոսյանը Կոտայքի մարզի դատախազին հաղորդում է ուղարկել՝ նշված իրավախախտումները քննության առարկա դարձնելու և օրինական կարգով ընթացքը լուծելու համար: Սակայն, մարզի դատախազությունը ետ է վերադարձնում մարզպետարանի կողմից տրամադրված փաստաթղթերը, այն համարելով անհիմն:

Սյունիքի արդեն նախկին մարզպետ Հունան Պողոսյանը նշանակվելուց անմիջապես հետո հայտարարեց, որ մարզպետարանի աուդիտի ծառայությունը մի շարք կառույցներում իրականացրել է համապատասխան ստուգումներ: «Ստուգումների արդյունքում եղել են և կարգապահական բնույթի խախտումներ, և խախտումներ, որոնց հետագա ընթացքը լուծելու համար նախապատրաստված ողջ նյութերի փաթեթը ուղարկվել է իրավապահ մարմիններին»,- ասել էր մարզպետը: Ավելորդ է նշել, որ մինչ օրս որևէ տեղեկություն չկա, թե ինչ բնույթի խախտումների մասին էր հիշատակում Պողոսյանը: Հիշեցնենք, որ մինչ Պողոսյանի պաշտոնը ստանձնելը, մարզը ղեկավարում էր Վահե Հակոբյանը:

Իհարկե, հարց է առաջանում, թե ինչպես է ստացվում, որ անոնս արած միլիարդների բացահայտումների մասին հանրությունը այդպես էլ չտեղեկացվեց: Ավելին՝ մի շարք նախարարություններում ընդհանրապես փակվել են ներքին աուդիտի բաժինները և դժվար էլ երբևէ հայտնի դառնա, թե հեղափոխությունից անմիջապես հետո սենսացիոն համարված բացահայտումները ինչու և ինչպես ջրվեցին: Տարբերակները թերևս այդքան էլ շատ չեն, կամ իշխանությունները ոչինչ չեն գտել, իսկ միլիարդների խախտումների մասին պնդումները արվել էին հեղափոխական պոպուլիզմի  ալիքի վրա, կամ ինչպես և բազմաթիվ հարուցված քրեական գործերի դեպքում, այստեղ էլ գործ ունենք ինչ-ինչ ստվերային պայմանավորվածությունների հետ:

Այս թեմայով ՌԴ-ն՝ ՀՀ անվտանգության միակ գարանտ. Արևմուտքի հեղինակավոր պարբերականների «անկեղծացումը» Անվտանգությո՞ւն, թե կուշտ որովայն. ՔՊ-ականների «առաջարկը»՝ ժողովրդին Տեղի է ունեցել ՔՊ նախաձեռնող խմբի նիստ․ ներկայացվել է Բրյուսելյան հանդիպման վերաբերյալ զեկույց Ինչ աղետների է հանգեցնելու Փաշինյանի արկածախնդրությունը Փաշինյանը հայտնել է՝ ինչ է պետք հաջողակ պետություն ունենալու համար (տեսանյութ) «Ժողվարչապետը» տվեց-անցավ բոլորին. Փաշինյանի «կոմպլեքսներն» ու վախերը Փաշինյանը ՔՊ-ականների հետ նիստ է անցկացնում (տեսանյութ) Փաշինյանն ու ԵԱՀԿ ՄԽ Ֆրանսիայի համանախագահը քննարկել են տարածաշրջանային նշանակության հարցեր Խորը խնդիրներ եմ տեսնում պետական համակարգի կառավարման առաջնային օղակում․ Փաշինյան Նիկոլ Փաշինյան, դու վարում ես մուրացկանի քաղաքականություն, իսկ մուրացկանին ոչ թե անկախ հայրենիք, այլ ֆորպոստ էլ չի հասնում. Շարմազանով