«Դիմելու ենք կտրուկ քայլերի». դերասաններն ահազանգում են իրենց խնդրի մասին և չեն պատրաստվում պարզապես լռել

Հուլիսի 3-ին ԿԳՄՍ նախարարությունը որոշում է կայացրել Երաժշտական կամերային թատրոնը միացնել Հակոբ Պարոնյանի անվան երաժշտական կոմեդիայի պետական թատրոնին: Նախարարությունից հայտնում են, որ այդ որոշման պատճառը Կամերայինի դերասաններին ավելի մեծ հարթակ տրամադրելն է:

Այս թեմայով ԼՈՒՐԵՐ.com-ը զրուցեց Կամերային թատորանի նախկին և ներկա դերասանների հետ՝ հասկանալու նրանց տեսակետը երկու թատրոնների միացման վերաբերյալ։ 

Դերասանուհի Լուիզա Ներսիսյանն ասաց, որ շատ բացասական է վերաբերվում այդ որոշմանը, քանի որ այդ թատրոնները շատ են տարբերվում իրարից. «Բացասական եմ վերաբերվում, քանի որ շատ լավ թատրոն է, ափսոս է՝ փակվի: Կամերայինը և Հակոբ Պարոնյանի անվան թատրոնը տարբեր օրգանիզմներ են, դրանք տարբեր ձևով են աշխատում, կարծում եմ՝ այդ երկուսի միաձուլումից կարող է մեկը տուժել: Դա նույնն է, ոնց որ ասեմ՝ մեր ընտանիքը միացնենք մի ուրիշ լավ ընտանիքի, հավես կապրենք էլի, բայց դրանք շատ տարբեր ընտանիքներ են»,- ընդգծեց Լուիզա Ներսիսյանը:

Կամերային թատրոնի դերասանուհի Լաուրա Բաբայանն էլ այն կարծիքին է, որ սխալ է դերասաններին այլ կառույց տանելը, քանի որ թատրոնը երկար տարիների ընթացքում հավաքել է հավատարիմ հանդիսատեսի մեծ բանակ, դերասանները սովորել են այդ թատրոնին, նրանցից յուրաքանչյուրն իր ներդրումն ունի թատրոնի կայացման գործում. «Մեզ ասում են՝ ձեզ լավ պայմաններ ենք տրամադրելու, այսպես ենք անում, որ ձեզ լավ լինի, կոպիտ ասած, այդ հեքիաթները մեզ մի՛ պատմեք: Եթե մեզ լավ պայմաններ են ցանկանում տրամադրել, ապա թող այստեղ տրամադրեն, մենք էլ էլ ավելի լավ ներկայացումներ բերմադրենք»,- նշեց դերասանուհին:

Նա անիրական է համարում 60 հոգուց ավելի մարդկանց տեղափոխումն այլ թատրոն, այն դեպքում, երբ, ինչպես Լաուրան է նշում, շատ դերասանների աշխատանք ունենալ-չունենալը դրվում է մեծ հարցականի տակ. «Հնարավոր է, որ մեր ներկայացումները չհամապատասխանեն իրենց նորմաներին, կամ ընդհարումներ լինեն։ Մենք ունենք մեր խաղացանկը ու այդքան էլ սիրուն չի լինի գնանք, ասենք՝ մենք մեր խաղացանկով եկել ենք բեմադրություն անելու: Մեր անձնակազմը պառակտելը շատ սխալ է»,- ասաց նա:

Դերասանուհի Անի Լուպեն էլ, որը 6 տարի շարունակ խաղացել է Կամերային թատրոնում, ընդգծեց, որ դրանց միացումը անիմաստ է. «Դեմ եմ թատրոնների միացմանը, չէի ցանկանա՝ նման բան լիներ, քանի որ դրանք տարբեր թատրոններ են: Կամերային թատրոնը ունի իր ուրույն տեղն ու տեսակը, այն միացնել Հակոբ Պարոնյանի թատրոնին` սխալ է և անիմաստ: Ամեն թատրոն ունի իր ոճը, ափսոս է, որ դրանք խառնեն իրար. ես կողմ եմ՝ Կամերայինը որևէ այլ թատրոնի չմիանա»,-նշեց դերասանուհին:

Թատրոնի  մեկ այլ դերասանուհի էլ անդրադարձավ ԿԳՄՍ նախարարի տեղակալ Արայիկ Խզմալյանի ասածին, այն է՝ թե քանի որ Կամերային թատրոնը երաժշտական է, ապա ինչու չմիանա Հակոբ Պարոնյանի անվան երաժշտական կոմեդիայի թատրոնին։ Դերասանուհուն վրդովեցրել է այն հանգամանքը, որ այդ հայտարարությունը անելուց առաջ նախարարի տեղակալն  իրենց ներկայացումներին երբեք ներկա չի եղել․ «Ես այս 6 տարվա ընթացքում 1 անգամ չեմ տեսել, որ նախարարի տեղակալը գա թատրոն՝ ներկայացում դիտելու։ Եթե ինքը գոնե մեկ անգամ գար  ներկայացումը դիտեր, ապա չէր ասի, որ Կամերիայինը երաժշտական թատրոն է»,- ասաց Լաուրա Թորոսյանը՝ նշելով, որ իրենք երաժշտական թատրոն են եղել 6-7 տարի առաջ, և քանի որ այլևս այդ ուղղվածությամբ ներկայացումներով հանդես չեն գալիս, շատ անգամներ են դիմել նախարարություն՝ թատրոնի անունը փոխելու, սակայն նրանց մերժել են։

Լաուրան ևս չի պատկերացնում իրենց աշխատանքը Հակոբ Պարոնյանի անվան թատրոնում․ «Երկու թատրոնների գոյությունը մեկ շենքում, պարզապես, անհամատեղելի է։ Պետության գերխնդիրը այստեղ թատրոնի լուծարումն է։ Իրականում մի քանի տարի առաջ մեզ խոսակցություններ են հասել այն մասին, որ թատրոնները ուզում են փակել, ուղղակի որպես թույլ օղակ, սկսեցին հենց մեզանից։ Իրենք ուզում են թատրոնը փակել և դա անում են Պարոնյանի ձեռքով»,- ասաց նա։

Դերասանուհին ընդգծեց, որ եթե Կամերային թատրոնը միանա Պարոնյանին, ապա իրենց մեծ թիմից միայն 5 հոգու կընդունեն աշխատանքի, այն էլ՝ զուտ մասսայական տեսարաններն ապահովելու։

Լաուրան հայտնեց, որ մի քանի նամակներ են գրել պատկան մարմիններին, և եթե դրանց պատասխանները նրանց չգոհացնեն պատրաստ են կտրուկ քայլերի դիմել․ «Եթե տեսնենք, որ մեր այս խնդրին, ոչ մի արձագանք չկա, կդիմենք կտրուկ քայլերի։ Մեր թիմով մենք պատարստ ենք մինչև վերջ գնալու»,- եզրափակեց դերասանուհին։

Զվարթ Պետրոսյան

Այս թեմայով ՈՒՂԻՂ. «ԳՈՅ»-ի աշխատակիցները փակ դռնով մուտք են գործում թատրոն Աննա Հակոբյանը ներկա է գտնվել ԱԺ-ի և Կոմիտասի անվան քառյակի կազմակերպած տոնական համերգին «Գոյ» թատրոնի ստեղծագործական կազմը ժամանակավորապես դադարեցրել է նստացույցը Հայտնի են Հ. Հայրապետյանի անվան ձիասպորտի փոխանցիկ հուշագավաթի հաղթողները Ալբերտ Ազարյանի անվան մարմնամարզության օլիմպիական հերթափոխի մանկապատանեկան մարզադպրոցը մոտ ապագայում կունենա նոր հասցե ՈՒՂԻՂ. «Գոյի» մուտքը փակել են. աշխատակիցները թատրոն են մտնում այլ ճանապարհով Շիրակում գործում է պետական ծառայությունների անվան տակ գործող ինքնակոչների խումբ. Կարեն Սարուխանյանը զգուշացնում է Կարեն Գիլոյանը հետևել է Հեծանվային սպորտի և Հրանտ Շահինյանի անվան մարզադպրոցի կառուցման աշխատանքներին Նախարար Ժաննա Անդրեասյանն այցելել է «Թատրոն տանիքում» այլընտրանքային թատրոն «Գոյ» թատրոնը պատրաստ է գործունեություն ծավալել որպես անկախ թատրոն