Լրագրողներին վրդովվեցրեց, որ Կարեն Անդրեասյանը նրանց համեմատեց Նաիրի Հունանյանի հետ
ՀասարակությունՈւզում եմ շեշտել, որ պրն Բադասյանը ինձ թողել է օրենսդրական մեծ ժառանգություն, և ես, վստահաբար դրա վրա հենվելով, կարող եմ բավարարել հասարակության որոշակի ակնկալիքներ: Այս մասին այսօր՝ օգոստոսի 6-ին, լրագրողների հետ զրույցում ասաց Արդարադատության նորանշանակ նախարար Կարեն Անդրեասյանը:
«Պրն Փաշինյանի բոլոր խոստումները սկսվել են իրականացվել, վեթինգը արդեն իսկ սկսված է, արդեն համակարգից դուրս մղված դատավորներ կան»,- ասաց նախարարը՝ անդրադառնալով լրագրողի այն դիտարկմանը, թե Փաշինյանի խոստումները այդպես էլ չեն իրականանում:
Նորանշանակ նախարարը, երկար տարիներ լինելով մարդու իրավունքների պաշտպան, խոսեց նաև ԱԺ-ում լրագրողների նոր սահմանափակումների մասին, որը համարեց նորմալ՝ նշելով՝ աշխարհի բոլոր քաղաքակիրթ երկրներում լինում են սահմանափակումներ. «Հիշելով, թե ով էր Նաիրի Հունանյանը, և որպես լրագրող՝ ինչեր կարող էր անել, պետք է հասկանանք, որ լրագրությունը կամ խոսքի ազատությունը բացարձակ արժեք չէ, և եթե անվտանգության մարմինները գտել են որոշակի ռիսկեր, պետք է դա հարգենք: Կարող են լինել նաև վարձկաններ՝ թաքնված լրագրողների կերպարի տակ: Մենք պետք է ձեզ համար կարողանանք ստեղծել ամենանպաստավոր պայմանները»,- նշեց Անդրեասյանը: