Վստահե՞լ «Ռոսգոստրախ Արմենիա»-ին, թե՞... . ընկերությունից տուժած քաղաքացին ահազանգում է
ՀասարակությունՕրերս ֆեյսբուքյան օգտատեր Թաթուլ Հակոբյանն իր դժգոհությունն է հայտնել Ռոսգոստրախ ապահովագրական ընկերության դեմ՝ ընդգծելով, որ այն անարդար է աշխատում: Քաղաքացին այդ գրառմամբ հորդորում է իր ընկերներին՝ ավելի բարեխիղճ և պատասխանատու ապահովագրող ընկերություն ընտրել, քան «Ռոսգոստրախ»-ն է:
Ըստ նրա խոսքերի՝ մայիսի 3-ին, ԱՊՊԱ չունեցող, ինքնաշեն, պետհամարանիշ չունեցող մոտոցիկլետի վարորդը դուրս է եկել հանդիպակաց մաս, հարվածել իր մեքենային՝ պատճառելով 422.000 դրամի վնաս: Ռոսգոստրախը նամակով տեղեկացրել էր, որ իրենք փոխանցելու են 422.000 դրամ: Եվ այնպես է ստացվում, որ Ֆինանսական հատուցումը վճարելու ժամկետի լրանալուց րոպեներ առաջ նա ընկերությունից ստանում է նոր նամակ, որով տեղեկացնում են, որ իրեն 0 դրամ են փոխհատուցելու, քանի որ հայտնի չէ, թե ում է պատկանում մոտոցիկլը, վարորդը չունի ԱՊՊԱ: Այնուհետև քաղաքացին մեկ այլ նամակ է ստանում Ռոսգոստրախից, որով իրեն տեղեկացնում են՝ փոխհատուցում ստանալու է իր մեքենայի վրա հարձակում իրականացրած մոտոցիկլիստի ընտանիքի անդամներից մեկը՝ 320 հազար դրամ:
Թաթուլ Հակոբյանն իր վրդովմունքն ու հիասթափությունն է հայտնում այդ ընկերությունից, և հայտնում՝ դիմել է Ֆինանսական համակարգի հաշտարարին, որը իր գործն ընդունել է վարույթ:
ԼՈՒՐԵՐ.com-ը տվյալ թեմայի հետ կապված կապ հաստատեց նաև Ռոսգոստրախ Արմենիայի մամուլի բաժնի պատասխանատու Էմմա Մոժարովայի հետ, որն ասաց՝ անկախ նրանից, որ «Ռոսգոստրախ Արմենիա»-ն Թաթուլ Հակոբյանի՝ պատասխանատվությունն ապահովագրած ընկերությունն է, սակայն պատճառված վնասը հատուցելու պարտավորություն այն չի կրում. «Ըստ օրենքի այսպես է, քանի որ մեզ հետ պայմանագիր կնքած Թաթուլ Հակոբյանը մեղավոր կողմը չէ։ Եվ քանի որ մեղավոր կողմը չունի ԱՊՊԱ պայմանագիր, ապա, համաձայն գործող օրենսդրության, Հայաստանի Ավտոապահովագրողների Բյուրոյի կողմից ընդունվել է որոշում՝ մերժելու գույքային վնասի հատուցման պահանջը»,- նշեց ընկերության մամուլի բաժնի պատասխանատուն՝ ընդգծելով՝ Թաթուլ Հակոբյանին պատճառված գույքային վնասների հատուցման պատասխանատվությունը պետք է կրի վնաս պատճառած անձը։
Օգտատիրոջ ֆեյսբուքյան գրառումը՝ ստորև.