Անկախության միջոցառման տեխնիկան թուրքական բեռնատարներով մատակարարել է գերմանական ընկերությունը

Համացանցում լուսանկարներ և տեսանյութ է տարածվել, որտեղ երևում է, թե ինչպես են Հանրապետության հրապարակում կայանված թուրքական բեռնատարից իջեցվում սեպտեմբերի 21-ի Անկախության միջոցառման համար նախատեսված տեխնիկան։ «Ահա թե ինչ գումարներով են պատրաստվում տոնակատարություններ կազմակերպել, արդեն պարզ է, թե ով ու ինչ է պատրաստվում տոնել, տեխնիկան և գումարները Թուրքիայից են»,-  գրել է տեսանյութը հրապարակած քաղաքացին։   

ԼՈՒՐԵՐ․com-ի հետ զրույցում միջոցառման կազմակերպիչ, «Դոմինո փրոդաքշն» ընկերության տնօրեն Աշոտ Առաքելյանը պարզաբանեց, որ տեխնիկան գերմանական է և այն արտադրում, վաճառում է բացառապես գերմանական ընկերությունը․ «Մենք պայմանագիր ենք կնքել գերմանական ընկերության հետ Spider cam համակարգեր ներմուծելու համար, որը ժամանակակից նկարահանման համակարգ է։ Այս համակարգի շնորհիվ հնարավոր է բարձր որակով 21-րդ դարին համապատասխան նկարահանումներ իրականացնել, անգամ վերևից լուսաբանել մեր Անկախության տոնին նվիրված միջոցառումը»,- ասաց նա։

Առաքելյանն ընդգծեց՝ տեխնիկայի տեղափոխման պարտավորությունը կրել է գերմանական ընկերությունը․ «Մենք ևս տեղում ենք տեսել, որ տեխնիկան գերմանական ընկերությունը առաքել է թուրքական գրառումներով բեռնատարով»,- նշեց «Դոմինո փրոդաքշն» ընկերության տնօրենը։ 

Հիշեցնենք, որ ՀՀ վարչապետ Նիկոլ Փաշինյանը հայտարարել է Անկախության օրվա միջոցառումներն անցկացնելու մասին․ «Սեպտեմբերի 21-ին Հանրապետության հրապարակում տեղի է ունենալու մասշտաբային և գունագեղ տոնակատարություն: Այն առաջին հերթին նվիրված է լինելու Հայաստանի անկախության, անվտանգության, ինքնիշխանության և Արցախի համար կյանքը զոհած մեր նահատակների հիշատակին»,- նշել է նա:

Սոնա Հարությունյան