ԱՄՆ-ն Ռուսաստանին անվանել է առաջիկա տասը տարվա ամենամեծ ռազմական սպառնալիքը
ԱշխարհՏեսանելի ապագայում Ռուսաստանը կմնա ՆԱՏՕ-ի համար հիմնական ռազմական սպառնալիքը, ասել է Կոնգրեսի լսումների ժամանակ Հյուսիսատլանտյան դաշինքում ԱՄՆ մշտական ներկայացուցչի պաշտոնում առաջադրված Ջուլիանա Սմիթը:
«Ռուսաստանը մնում է եվրաատլանտյան տարածաշրջանի ամենամեծ աշխարհաքաղաքական սպառնալիքը և, անշուշտ, կմնա ՆԱՏՕ-ի դաշինքի ամենամեծ ռազմական սպառնալիքը տեսանելի ապագայում և, իհարկե, հաջորդ տասնամյակում»,-ասել է Սմիթը:
Նրա խոսքով՝ Հյուսիսատլանտյան դաշինքը 2014 թվականից ի վեր, երբ սկսվեց Ուկրաինայի ճգնաժամը, շատ բաների է հասել Մոսկվային դիմակայելու իր կարողությունների ամրապնդման առումով, սակայն դեռ շատ անելիքներ կան:
«Ռուսական ագրեսիան շարունակվում է, մենք պետք է պատասխանատվության ենթարկենք Ռուսաստանին՝ իր բոլոր գործիքների կիրառմամբ կատարված բոլոր գործողությունների համար՝ լինի դա սովորական կարողությունների, ՆԱՏՕ-ի օդային տարածք ներխուժման, ահաբեկման կամ կիբերհարձակումների մասին», - ասել է Սմիթը:
Բացի այդ՝ Սմիթը հավելել է, որ կշարունակի «դժվարին հարցեր» ուղղել Թուրքիային և համոզել նրան Ռուսաստանից С-400 ՀՕՊ համակարգեր գնելու անթույլատրելիության մեջ: