Նիգերիացին առաջադրվել է Թբիլիսիի քաղաքապետի ընտրություններին

Հոկտեմբերի 2 -ին Վրաստանում տեղի կունենան տեղական ինքնակառավարման մարմինների ընտրությունները: Թբիլիսիի քաղաքապետի աթոռին հավակնում է նաև «էկզոտիկ» թեկնածու, ծնունդով Նիգերիայից, իգբո ժողովրդի ներկայացուցիչ Արինզե Ռիչարդ Օգբունուջուն:

Ինչպես հայտնում է Sputnik-georgia.ru-ն, նա «Մեր Միացյալ Վրաստանը» քաղաքական ուժի առաջնորդն է և պատրաստվում է պայքարել մայրաքաղաքի քաղաքապետի պաշտոնի համար:

«Երբ առաջին անգամ եկա այստեղ, առաջին բանը, որ ինձ զարմացրեց, այն էր, որ ծառերի վրա տերևներ չկային: Որտեղից ես գալիս եմ, կանաչ է ամբողջ տարին: Ես բավականաչափ բառեր չունեմ նկարագրելու, թե որքան դա ցնցեց ինձ: Երկրորդ ցնցումն այն էր, որ երբ ես քայլում էի փողոցներով, մարդիկ հետևում էին ինձ և տարօրինակ բաներ հարցնում: Ինչ-որ մեկն ինձ հարցրել է` մեքենա ունե՞ք ձեր երկրում: Կատակեցի, ասացի, որ մեքենա կամ տուն չկա: Ես նաև ավելացրել եմ, ասում են՝ մեզ մոտ ձեր երկրի դեսպանատունը անտառում է: Եվ այսպես, կատակներին հաջորդեցին նոր ծանոթություններ, հայտնվեցին նոր ընկերներ: Դա ինձ համար բոլորովին նոր բան էր»,- ասել է Օգբունուջուն:

Օգբունուջուի խոսքով՝ ինքն ամեն ինչ անում է այնպես, ինչպես վրացիներն են անում, քանի որ յուրացրել է տեղական մտածելակերպը, խոսում է վրացու պես:

«Ինձ նույնիսկ ասում են, որ ես թբիլիսյան քայլվածք ունեմ: Ի դեպ, տեղացիներին ես դուր եմ գալիս: Չգիտեմ ինչու, բայց ես դա զգում եմ: Ինչ-որ մեկը, թերևս, քաղաքապետի իմ առաջադրման մասին կասի՝ ի՞նչ է պետք այս սևամորթին, իսկ ես կպատասխանեմ՝ վրացի եմ, եղբայր: Ես սիրում եմ այս քաղաքը, ես սիրում եմ այս երկիրը: Ցանկանում եմ, որ մարդիկ չտուժեն աղքատությունից, որպեսզի թափառող շները դժբախտ չմահանան փողոցում, որպեսզի երիտասարդներն ունենան ապագա և լավ աշխատանք: Ես չեմ գնում ընտրությունների, քանի որ ուզում եմ քաղաքապետ լինել: Ես գնում եմ ընտրությունների, որպեսզի իմ ձայնը լսելի լինի, ես ուզում եմ, որ բոլորը իմանան, որ ես այլևս չեմ կարող աչքերս փակել այն բանի վրա, թե ինչպես են իմ սիրելի երկրում մարդիկ սովից մահանում: Թբիլիսիի սիրելի՛ բնակիչներ, ես՝ Արինզե Ռիչարդ Օգբունուջուն, անկեղծորեն սիրում եմ այս քաղաքը և այս երկիրը»,-նշել է նա: