Թունավորում շմոլ գազից. 7 հոգի, որոնցից 3-ը՝ անչափահաս, տեղափոխվել են հիվանդանոցներ
Արտակարգ ՊատահարԱյսօր՝ սեպտեմբերի 30-ին, արտակարգ դեպք է տեղի ունեցել Երևանում։ Արտակարգ իրավիճակների նախարարության փրկարար ծառայության 911 ճգնաժամային կառավարման կենտրոն ահազանգ է ստացվել, որ բժիշկների հերթապահ խումբը Ահարոնյան փողոցի շենքերից մեկից 7 քաղաքացու տեղափոխել է Երևանի տարբեր հիվանդանոցներ։
Անձանցից 3-ն անչափահասներ են, ովքեր տեղափոխվել էին «Մուրացան» բժշկական կենտրոն, որտեղից ԼՈՒՐԵՐ.com -ի հետ զրույցում ասացին՝ երեխաների վիճակը արդեն լավ է. «3 երեխաներն էլ միևնույն ընտանիքից են եղել, թունավորվել էին շմոլ գազից, հիմա արդեն դուրս են գրվել»,- հայտնեցին Մուրացանից:
4 քաղաքացիներն էլ տեղափոխվել էին «Արմենիա» բժշկական կենտրոն։ Այնտեղից մեզ ասացին, որ նրանցից միայն 2-ի առողջական վիճակն է միջինից ծանր եղել. «4-ը տարբեր ընտանիքներից են եղել, սակայն այդ պահին գտնվել են մեկ տան մեջ: Նրանք թունավորվել էին շմոլ գազից: Բոլոր բուժումները ստանալուց հետո դուրս են գրվել»,- ասացին հիվանդանոցից: