Դիլիջանի ծառաներն ու նրանց խոստումները. թեժ ընտրապայքար է սպասվում

Հասարակություն 11 Հոկտեմբեր, 2021 15:10

Հոկտեմբերի 17-ին Դիլիջանում տեղի են ունենալու ՏԻՄ ընտրություններ, որին մասնակցում է 5 կուսակցություն՝ «Ապրելու երկիր», «Հայրենիք», «Հանրապետություն», «Քաղաքացիական պայմանագիր», «Քաղաքացու որոշում» սոցիալ-դեմոկրատական կուսակցությունները:

Ընտրություններին ընդառաջ ԼՈՒՐԵՐ.com-ը զրուցեց «Հայրենիք» կուսակցության կողմից առաջադրված Արմեն Օրդինյանի հետ, որի կարգախոսն է «Դիլիջա՛ն, իմ հայրենիք»: Արմեն Օրդինյանի հետ զրույցից պարզ դարձավ՝ վստահ է՝ ինքն է հաղթելու. «Ընտրություններում շանսերս գնահատում եմ 100%»,- ասաց նա:

Մեր այն հարցին, թե ինչով է պայմանավորված իր այդչափ վստահ լինելը, մեր զրուցակիցը պատասխանեց, որ առաջին հերթին հավատում է հենց իր ուժերին. և այդ մտքին է հանգել մարդկանց կարծիքը լսելով:

Վերջինս ընդգծեց, որ 4 թեկնածուներն էլ իր համար ուժեղ մրցակիցներ են, բայց, միևնույն է, հաղթողն ինքն է, չնայած այն հանգամանքին, որ բոլոր 4-ին էլ գնահատում է որպես ուժեղ մրցակիցներ, քանի որ նրանք էլ շատ աշխատանքներ են տանում:

Անդրադառնալով իրենց կարգախոսին՝ Արմեն Օրդինյանն ասաց՝ այն ընտրել են՝ հիմք ընդունելով իրենց կուսակցության անվանումը. «Կարգախոսն է՝ Դիլիջա՛ն, իմ հայրենիք: Նստել ենք ու որոշել, քանի որ մենք «Հայրենիք» կուսակցության անդամներ ենք, Դիլիջանն էլ մեր փոքրիկ հայրենիքն է, էլի»,- ասաց Դիլիջանի քաղաքապետի թեկնածուն:

Չնայած Արմեն Օրդինյանի այսչափ ինքնավստահությանը, հետևելով նրա ֆեյսբուքյան էջին, կարող ենք ասել, որ նա այդքան էլ ակտիվ չէ այդ հարթակում համեմատած իր 4 մրցակիցների հետ: Արմեն Օրդինյանի թիմակիցները ֆլեշմոբ են իրականացնում «Գեներալի հետ եմ» լոզունգով, չնայած այն հանգամանքին, որ Օրդինյանը կոչումով փոխգնդապետ է:

«Ապրելու երկիր» կուսակցությունն առաջադրել է Արմինե Հարությունյանին, նրա կարգախոսն է՝ «Ապրելու Դիլիջան»: Արմինե Հարությունյանը շատ ակտիվ է սոցհարթակներում: Նա լուսանկարներով անընդմեջ կիսվում է, թե քարոզարշավի տվյալ օրը որտեղ է գտնվել, ում է հանդիպել և այլն: Թեև Արմինե Հարությունյանի կուսակցությունը որևէ կապ չունի հայտնի գործարար, բարերար Ռուբեն Վարդանյանի հետ, այնուամենայնիվ այս կուսակցության անդամները համատեղ նախագծեր են իրականացնում գործարարի հետ: Ակնհայտ է, որ Արմինե Հարությունյանը հպարտանում է իր կապերով, որը կարող է իր հաջողության բանալին դառնալ Դիլիջանում: Նշենք, որ «Ապրելու երկիր» կուսակցությունն այս ընտրություններում կմասնակցի Հայաստանի հինգ համայնքում՝ Սյունիքի մարզի Տեղ, Տաթև, Մեղրի, Դիլիջանի խոշորացված համայնքներում և Գյումրիում»։

«Հանրապետություն» կուսակցությունը առաջադրել է Արմեն Ուլիխանյանին, որի կարգախոսն է՝ «Ծառայեմ Դիլիջանիս»: «Հանրապետություն» կուսակցության կողմից առաջադրած այս թեկնածուն ևս առցանց հարթակում բավականին ակտիվ կիսվում է իր քարոզարշավով: 3-րդ համարի թեկնածուն հպարտանում և կիսվում է իր ընկերների կարծիքով, քայլում Դիլիջանով և մտածում քաղաքի զարգացման մասին՝ համարելով, որ իր տարիների փորձով կարող է զարգացնել Դիլիջանը: Արմեն Ուլիխանյանն իրեն արդեն պատկերացնում է Դիլիջանի համայնքապետի պաշտոնում և հանդիպումներ ունենում տեղի գործարարների հետ: Աշխատատեղեր ստեղծելու հարցերով, ի դեպ, Դիլիջանի ծառան, ասաց, որ պայմանավորվածություններ կստեղծի միայն այն դեպքում, երբ հաղթի ընտրություններում, իսկ մինչ այդ գուցե զլանա ծառայելու իր ծննդավայրին: Ի թիվս այլ խոստումների՝ Արմեն Ուլիխանյանը ծրագրում է նաև Դիլիջանում զարգացնել ոչխարաբուծությունը:

«Քաղաքացիական պայմանագիր»-ը՝ Դավիթ Սարգսյանին, կարգախոսն է՝ «Ապագա կա՛ Դիլիջան»: Նշենք, որ Դավիթ Սարգսյանը Դիլիջանի քաղաքապետի ժամանակավոր պաշտոնակատարն է, որին էլ վրդովեցրել է իր մրցակիցների պահելաձևը: Ըստ Սարգսյանի՝ մրցակիցները իր իսկ կատարած աշխատանքը իրենց են վերագրում՝ այսպիսով մոլորեցնելով քաղաքացիներին. Դավիթ Սարգսյանը, մասնավորապես, գրել է. «Խոսքս վերաբերվում է Շամախյան թաղամասում մինչ օրս կատարված աղբամանների ցանկապատման աշխատանքներին։ Նշված աղբամանների ցանկապատման գաղափարից մինչև տեխնիկական աշխատանքների ավարտը իրականացրել է Դիլիջանի համայնքապետարանը։ Համայնքում մինչ օրս ցանկապատվել է 15 աղբաման, որից 7-ը ֆինանսավորվել է Հայկ և Ռաֆայել ՍՊԸ-ի կողմից, 8-ը՝ Իմպուլս կառավարման ընկերության, որոնք որևէ կուսակցության հետ կապ չունեն։ Կոչ եմ անում և հորդորում կուսակցական թիմերին ապատեղեկատվություն չտարածել բնակչության շրջանում»։

«Քաղաքացու որոշում» սոցիալ-դեմոկրատական կուսակցությունն էլ առաջադրել է Արա Մարտիրոսյանին, նրա կարգախոսն է՝ «Քո որոշումը, Դիլիջա՛ն»: Ըստ կենսագրության՝ թոշակ բաժանելու գործում վարպետացած Արա Մարտիրոսյանը խոստանում է տարածքային համաչափ և կայուն զարգացում: Ըստ ֆեյսբուքում նրա ակտիվության՝ մեծ ժողովրդականություն չվայելողը խնդրել է, որ քաղաքացիները իր լուսանկարի տակ մեկնաբանություններ գրեն, թե ինչ հարցի շուրջ են ցանկանում, որ նա խոսի: Հատկանշական է, որ նրան տրվել է ընդամենը 1 հարց, թե ինչ է անում նա ԼԳԲՏ համայնքին օգնելու համար, ովքեր խտրականության են ենթարկվում ոչ միայն Դիլիջանում այլև ողջ Հայաստանում: Մեզ ևս հետաքրքիր է, թե վերոնշյալ հարցին ինչ պատասխան կտա Արա Մարտիրոսյանը: