Իրականում պատերազմն այն ձևով, որով ավարտվել է, որևէ կողմին չի բավարարում․ Սուրեն Սարգսյան

Իրականում պատերազմն այն ձևով, որով ավարտվել է, որևէ կողմին չի բավարարում։ Այս մասին  «Հայաստան» դաշինքի  կազմակերպած «Հայաստանին և Արցախին սպառնացող վտանգներն ու դրանց հաղթահարման ուղիները» թեմայով քննարկման ընթացքում ասաց փորձագետ Սուրեն Սարգսյանը։

«Հայաստանը բավարարաված չէ, որովհետև կորցրել է։ Ադրբեջանը բավարարված չէ, որովհետև մի մասը վերցրել է, բայց մյուս մասն առնվազն տվել է ռուսներին և հնարավոր չէ ընդհանրապես վերցնել։ Թուրքիան բավարարված չէ, քանի որ այն ակտիվությունը, ներգրավածությունը որ տարածաշրջանում կարող էր ունենալ, այդ ազդեցությունը ձեռք չբերեց։ Բնականավար Իրանն էլ բավարարաված չէ այն ամենով ինչը տեղի է ունենում և վառ ապացույցն է իրանական զորքի առկայությունն է ադրբեջանական սահմանին։ Ուրեմն արդյո՞ք կարող ենք ասել, որ պատերազմն ավարտվել է։ Այս փուլը գոնե ավարտվել է, իսկ հաջորդը կլինի ռազմական գործողություններով, թե դիվանագիտական ճակատում պայքարում, դժվար է ասել»,- ասաց նա։

Անդրադառնալով Ալիևի հայտարարություններին առ այն, որ ԼՂ խնդիրը լուծված է, Սարգսյանը մեջբերեց նաև Մինսկի խմբի համանախագահների հայտարարությունները՝ ամեն ինչ անելու են, որպեսզի խնդիրը ստանա վերջնական և հարատև լուծում։

«Սա նշանակում է, որ մենք ինչ-որ բան ունենք ստանալու։ Հասկանալի է, որ մենք հիմա ծանր վիճակում ենք գտնվում, բայց եթե ինչ-որ բան հիմա չստանանք, ապա անխուսափելիորեն Հայաստանում մի օր  իշխանության են գալու քաղաքական ուժեր, որոնք ցանկանալու են ինչ-որ բան հետ բերել՝ կլինի Հադրութը, թե Շուշին։ Հիմա միջազգային քաղաքական իրադրությունն այս մասով բարենպաստ է մեզ համար, դիվանագիտության, արտաքին քաղաքակնության համար՝ ինչ-որ մի բան վերցնելու տեսանկյունից»,- ասաց փորձագետը։