ԱՀԿ ղեկավարը խոսել է հնարավոր նոր վիրուսի մասին, որին զսպել հնարավոր չի լինի
ԱշխարհԱռողջապահության համաշխարհային կազմակերպության (ԱՀԿ) գլխավոր տնօրեն Թեդրոս Ադհանոմ Գեբրեյեսուսը նախազգուշացրել է նոր վիրուսի հնարավոր ի հայտ գալու մասին, որին հնարավոր չի լինի զսպել, գրում է Ռիա Նովոստին։ «Կենսաբանական տեսանկյունից կասկած չկա, որ մի օր կլինի մեկ այլ վիրուս, որը մենք պարզապես չենք կարողանա զսպել», - ասել է նա G20-ի առողջապահության և ֆինանսների նախարարների հանդիպման ժամանակ:
ԱՀԿ ղեկավարի խոսքով՝ անհրաժեշտ է դասեր քաղել ներկա համաճարակից՝ հաջորդին պատրաստվելու համար։
Համաշխարհային հանրությանը անհրաժեշտ է «ուժեղացված» ԱՀԿ, նոր ֆինանսական մեխանիզմ՝ ապահովելու պայքարը համաճարակների դեմ և ավելի լավ կառավարում՝ ստեղծելով առողջապահական սպառնալիքների դեմ պայքարի ֆինանսավորման խորհուրդ և ստորագրելով համաճարակի համաձայնագիր։
Ավելի վաղ ԱՀԿ ղեկավարն ասել էր, որ կորոնավիրուսի համաճարակը կավարտվի, եթե մարդկությունը որոշի դա անել, քանի որ աշխարհն ունի բոլոր անհրաժեշտ գործիքները՝ հիվանդությունը հաղթահարելու համար։
Ըստ Գեբրեյեսուսի՝ մինչև տարեվերջ աշխարհի յուրաքանչյուր երկրի բնակչության առնվազն 40%-ին պատվաստելու նպատակը «իրագործելի է», սակայն դրա համար պետություններն ու ընկերությունները պետք է գործեն իրենց հայտարարություններին համապատասխան։