Եթե անվտանգության բարձիկները՝ Ռուսաստանը և ՀԱՊԿ-ը չաշխատեն, պետք է հրաժարվենք այդ բարձիկներից. Վիգեն Խաչատրյան
ՔաղաքականԼրջագույն փուլ է ապրում հայ ժողովուրդը իր ինքնիշխան պետականության հաստատման ճանապարհին եւ այս փորձությունը մենք պատվով անցնելու ենք: Այս մասին Ազգային ժողովում հայտարարությունների ժամին ասաց «Քաղաքացիական պայմանագիր» խմբակցության անդամ Վիգեն Խաչատրյանը։
«Հիմա Հայաստանին ուրանալը դավաճանություն է, պետք է հիմա ողջ հայ ժողովուրդը միաձուլվի, մոռանա բոլոր ներքին և արտաքին տարաձայնությունները, և մենք մեզ պահենք՝ ինչպես պատերազմում»,-ասաց նա:
Վիգեն Խաչատրյանը նշեց, որ պատերազմը չի ավարտվել, և այսօր մեր ինքնիշխանության հաստատման ամենակարևոր փուլն ենք ապրում։ «Մեր հակառակորդները նախեւառաջ հաշվի են առնում մեր ներքին անհամաձայնությունները նման սանձարձակ լկտիություն դրսեւորելիս: Նրանք պետք է հանդեիպեն խուլ պատի: Իրենք պետք է համոզվեն, որ մենք ամեն ինչ կդնենք մի կողմ հանուն մեր պետության ու ինքնիշխանության: Հիմա այդ պահն է: Այս դահլիճում մի ազատ աթոռ չպետք է լիներ, ես կարծում եմ, որ քաղաքական իշխանությունը պետք է լուծում գտնի, և ես կողմ եմ, որ պատերազմական իրավիճակ հայտարարենք երկրում, էլ ոնց է լինում պատերազմը»,-ասաց նա։
Վիգեն Խաչատրյանը նշեց, որ եթե անվտանգության բարձիկները՝ Ռուսաստանը և ՀԱՊԿ-ը չաշխատեն, պետք է հրաժարվենք այդ բարձիկներից, քանի որ մենք ժամանակ չունենք։ Թող իրենք մտածեն. Իրենք են ստանձնել պարտավորություն։ Ռուսաստանի նախագահը ստորագրել է, թող հաշիվ տա իրեն՝ իր ստորագրությունը հարգող կա՞, թե՞ չկա՝ ի դեմս Ադրբեջանի լկտի, ֆաշիստ ղեկավարի»,-ասաց նա և նշեց, որ չի կարծում, թե ճարահատյալ վիճակում ենք։
«Երկու տարի է՝ քաղաքականություն է դրսից պարտադրվում Հայաստանի ներքին ուժերի միջոցով, անկառավարելիության քաոս ստեղծել Հայաստանում, չստացվեց, չի էլ ստացվելու, հիմա ամենավտանգավորը կառավարելիության քաոսն է, որը պետք է բացառենք։ Մեր ժողովուրդը խառնվելու ոչինչ չունի, ծանր իրավիճակ է, բայց սա այն պահն է, երբ հայ ազգը պետք է միավորվի: 1920 թվի պատմությունը նորից ուզում են մեր վզին փաթաթել, չի ստացվելու: Սա նոր չի մեզ համար, տեսել ենք այս ամեն ինչը: Մենք պետք է անվտնգության բարձիկներ ունենանք: Թող այդ անվտանգության բարձրկի կողմերը մտածեն՝ իրենք բարձիկի դերո՞ւմ են, թե՞ ծակած փուչիկ են»,-ասաց նա։