Մենք այսօր անգամ չգիտենք՝ հայրենիք ունե՞նք, թե չունենք..․ Բագրատ Սրբազան

Մենք այսօր անգամ չգիտենք՝ Հայրենիք ունե՞նք, թե՞ չունենք։ Մենք այսօր չգիտենք նույնիսկ, թե որտեղ է մեր պատասխանատվության բաժինը, ինչպես է դա ձևակերպվում, ինչն է մեր Հայրենիքը, որտեղ է մեր կյանքը, որտեղ է Աստծուց տրված մեր սրբազան պատասխանատվությունը։

 

Աստված հստակ ասում է՝ դուք Իմ տաճարներն եք․ չի կարող լույսը խավարի հետ լինել, չի կարող սատանայի հետ Քրիստոս լինել, չի կարող արդարությունը անօրենության հետ լինել։

 

Այսօր մեր ամբողջ կյանքը վայրենություն է դարձել՝ քաղաքական, կյանքը, տնտեսական կյանքը, սոցիալական կյանքը, առողջապահական կյանքը, իրավական կյանքը, բոլոր հարաբերությունները։

 

Հոգևոր արժեքների նվազում է տեղի ունենում, և այս դժբախտությունների, այս ճգնաժամի պատճառը հոգևոր գիտակցության բացակայությունն է՝ լույսը խավարի հետ խառնելու, սատանային Քրիստոսի հետ խառնելու, անօրենությունն ու արդարությունը խառնելու։ Սրա պատմությունն է դառնում մեր կյանքը։

 

Բայց Աստված հստակ խոստում ունի։ Ժողովուրդ, հավատացե՛ք այդ խոստումին։

Այսօր Աստծուն ծաղրում են, Իրեն հավատացողներին ծաղրում են, Նա ամեն օր հարձակման է ենթարկվում հեռուստացույցով, համացանցով, ամեն խելապակասի կողմից՝ առանց հասկանալու, որ այդ խոսքն արժեք ունի, տեղ է հասնում։ Խոսում են չարի շատանալու, չարից բռնված լինելու՝ հոգևոր տիրույթի մասին, բայց, միևնույն ժամանակ, չեն խոսում, թե ինչպես ազատագրվել այդ չարից։ Մարդկային ջանքերով ինչպե՞ս պետք է ազատագրվել հոգևոր տիրույթի կապանքներից․ ոչ մի ձևով։ Հակառակը, ավելի նպաստելու ենք, որ այն շատանա»: