«Ձեր խոնարհ ծառա, արմավիրցի Համբարձում Մաթևոսյան». նորանշանակ փոխվարչապետը գրառում է արել

Երեկ Հայաստանի փոխվարչապետ նշանակված Համբարձում Մաթեւոսյանը, որը մինչ այդ զբաղեցնում էր Արմավիրի մարզպետի պաշտոնը իր ֆեյսբուքյան էջում գրառում է արել՝ դիմելով արմավիրցիներին:

«Արմավիրի մարզի սիրելի բնակիչներ, հարգելի գործընկերներ,

Ես դադարեցրել եմ Արմավիրի մարզպետի լիազորությունների կատարումը՝ նշանակվելով Հայաստանի Հանրապետության փոխվարչապետի պաշտոնում:

Անկեղծորեն պետք է նշեմ, որ մեծ պատասխանատվությամբ եմ ստանձնել Արմավիրի մարզպետի պաշտոնը և այս երեք տարիների ընթացքում փորձել եմ անել հնարավոր ու անհնար ամեն բան՝ մեր մարզի առաջընթացն ապահովելու և ազգաբնակչության կենսամակարդակը բարելավելու համար:

Հանգամանքների բերումով ուղղակի չկարողացա հանդես գալ իմ պաշտոնավարման երեք տարիները ներկայացնող հաշվետվությամբ: Սակայն խոստանում եմ, որ անպայման ժամանակ կգտնեմ և Ձեզ կներկայացնեմ մարզի զարգացմանն ուղղված ծրագրերի վերաբերյալ առարկայական տվյալներ, որոնք ես համարում եմ համատեղ ձեռքբերումներ: Իհարկե, ես և իմ գործընկերները երբեք չենք սահմանափակվել մեր հաջողություններով և ձգտել ենք ավելիին:

Եվ ի ուրախություն բոլորիս, այսօր Հայաստանի Հանրապետության 2022 թվականի բյուջեի նախագծով, պետական այլ միջոցներով, հիմնադրամների և միջազգային դոնոր կազմակերպությունների ծրագրերով գալիք տարվա համար սահմանել ենք մարզի զարգացմանն ուղղված առավել բարձր նշաձող, որը, վստահորեն կարող եմ ասել, իրականացվելու է մեծ պատասխանատվությամբ և ամբողջ ծավալով: Ինձ հարազատ մարզի սիրելի բնակիչներ և գործընկերներ, Հավատացնում եմ բոլորիդ, որ Արմավիրի մարզից հեռու լինելով էլ հետևողականորեն շարունակելու եմ զբաղվել մեր մարզի խնդիրների լուծմամբ:

Ես համոզված եմ, որ կարճ ժամանակ անց Արմավիրի մարզն ամբողջությամբ փոխելու է իր դիմագիծը՝ հետևում թողնելով անլուծելի համարվող բոլոր խնդիրներն ու հարցերը: Ամփոփելով խոսքս՝ ցանկանում եմ խորին երախտագիտություն հայտնել մարզպետարանի աշխատակիցներին, Կառավարության, Ազգային ժողովի գործընկերներին, ուժային կառույցների մարզային պատասխանատուներին, տեղական ինքնակառավարման մարմինների ներկայացուցիչներին, կրթական, առողջապահական հաստատությունների և այլ ոլորտների ներկայացուցիչներին, որոնց հետ անցել եմ այս բարդ ու պատվաբեր ճանապարհը՝ համատեղ ուժերով հաղթահարելով ընթացիկ խոչընդոտներն ու դժվարությունները:

Հարգելի գործընկերներ, թող Ձեր աշխատանքը միշտ գնահատված լինի և ծառայի Արմավիրի մարզի շենացմանը, բնակչության բարօրությանն ու պետության հզորացմանը: Միաժամանակ շնորհակալություն եմ հայտնում Հայաստանի Հանրապետության վարչապետ Նիկոլ Փաշինյանին՝ բարձր վստահության համար՝ խոստանալով, որ անելու եմ հնարավորը՝ արդարացնելու իր և մեր հայրենակիցների սպասումները: Ամենայն լավն ու բարին բոլորիդ:

Ձեզ շատ հարգող, Ձեր խոնարհ ծառա, արմավիրցի Համբարձում Մաթևոսյան»:

Այս թեմայով ՀՀ փոխվարչապետն ընդունել է Շարժայի ժառանգության ինստիտուտի նախագահի գլխավորած պատվիրակությանը Փոխվարչապետ Մաթևոսյանն ընդունել է տեխնոլոգիական և խորհրդատվական առաջատար ընկերությունների ներկայացուցիչների ՀՀ փոխվարչապետ Համբարձում Մաթևոսյանն այցելել է մարտական դիրքեր Համբարձում Մաթևոսյանը կազատվի Արմավիրի մարզպետի պաշտոնից Արմավիրի մարզը թունավորումից հետո աղետալի վիճակում է. մարզպետը ելքեր է փնտրում Եղեգնուտի համայնքապետարանի՝ մոտ մեկ ամիս շղթաներով փակված դուռը բացվեց (տեսանյութ) Եղեգնուտցիների խնդրի հասցեատերը մարզպետարանը չէ. Համբարձում Մաթևոսյան