Երևանում վիճաբանությունն ավարտվել է դանակահարությամբ. բժիշկները պայքարում են վիրավորի կյանքի համար

Դեկտեմբերի 8-ին դանակահարություն է տեղի ունեցել Երևանում։ Ժամը 22։00-ի սահմաններում ոստիկանության Արաբկիրի բաժին ահազանգ է ստացվել, որ Ավետիսյան փողոցի շենքերից մեկի բնակարանից դանակահարված վիճակում «Արմենիա» բժշկական կենտրոն է տեղափոխվել մի քաղաքացի։ 

Ինչպես հայտնում է Shamshyan.com-ը, հիվանդանոց են մեկնել ոստիկանության Արաբկիրի բաժնի օպերատիվ խումբը՝ բաժնի պետ Երվանդ Նիկոյանի գլխավորությամբ։ 

Ոստիկանները պարզել են, որ վիրավորը նշված փողոցի բնակիչ՝ 36-ամյա Տիգրան Տ-ն է։ 

Մինչ Արաբկիրի ոստիկանները պարզում էին դեպքի հանգամանքները, ՀՀ ոստիկանության պարեկային ծառայության Երևանի գնդի 2-րդ գումարտակի 2-րդ վաշտի պարեկները՝ գումարտակի հրամանատարի տեղակալ Դավիթ Նիկողոսյանի, վաշտի հրամանատար Ռոման Միրզախանյանի գլխավորությամբ տաք հետքերով պարզել են, որ վիճաբանություն-դանակահարությունը տեղի է ունեցել Վաղարշյան փողոցում գործող բենզալցակայանի հարևանությամբ։ 

Պարեկները սահմանազատել են տարածքը, մինչ կժամանեին Արաբկիրի ոստիկանները։ Ոստիկանության Արաբկիրի բաժնի քրեական հետախուզության բաժանմունքի ծառայողները պարզել են՝ որ բնակարանից է վիրավորը տեղափոխվել հիվանդանոց։ Այնտեղ՝ աստիճանների դռան փականի վրա, հայտնաբերվել են արնանման հետքեր։

Փաստի առթիվ ոստիկաության Արաբկիրի բաժնի հետաքննական բաժանմունքում նյութեր են նախապատրաստվում։

Կայքի տեղեկություններով՝ Արաբկիրի ոստիկաններն արդեն որոշ մանրամասներ գիտեն դեպքի վերաբերյալ, սակայն նախաքննության
շահերից ելնելով՝ այդ պահին չենք հրապարակում։ 

Կայքի տեղեկություններով՝ Տիգրան Տ-ն դանակի հարված է ստացել պարանոցի և ազդրի հատվածում։