Պեսկովը Հունաստանին առաջարկել է օրինակ վերցնել Թուրքիայից
ԱշխարհՌԴ նախագահի մամուլի քարտուղար Դմիտրի Պեսկովը հունական ANT1 հեռուստաալիքին տված հարցազրույցում ասել է, որ Ռուսաստանը պատմականորեն առանձնահատուկ հարաբերություններ ունի Հունաստանի հետ և կան դրանց հետագա զարգացման հնարավորություններ՝ Աթենքին հրավիրելով դիտարկել Թուրքիայի համագործակցությունը, որը նույնպես ՆԱՏՕ-ի անդամ է, Ռուսաստանի հետ, այդ թվում՝ ռազմական ոլորտում։ Այս մասի նա ասել է Սոչիում ՌԴ նախագահ Վլադիմիր Պուտինի և Հունաստանի վարչապետ Կիրիակոս Միցոտակիսի հանդիպման նախօրեին:
«Պատմականորեն մենք շատ առանձնահատուկ հարաբերություններ ունենք Հունաստանի հետ: Խոսքը վերաբերում է մարդկանց, հոգևորությանը, կրոնին: Ամեն անգամ մենք մեծ հույսով ենք նայում մեր երկկողմ հարաբերությունների ապագային: Մենք ունենք առևտրատնտեսական համագործակցության շատ լավ ծավալ, այն բարելավվում է», - ասել է ՌԴ նախագահի մամուլի քարտուղարը։
Հարցին, թե ինչպես կգնահատի ռուս-հունական հարաբերությունները տասը բալանոց սանդղակով, Պեսկովն ասել է. «Միգուցե սա ինչ-որ չափով անձնական [կարծիք] է, խոսքը վեցի մասին է, քանի որ դեռ շատ անելիքներ կան։ Նախ պետք է մտածել երկկողմ առևտրատնտեսական համագործակցության մասին, քանի որ դա լավագույն ապահովագրական համակարգն է։ Այն մեզ կօգնի շրջանցել և փրկել մեզ քաղաքական անկայունությունից։ Հունաստանը ՆԱՏՕ-ի անդամ է, Հունաստանը ԵՄ անդամ է, և մենք այժմ լուրջ խնդիրներ ունենք այս երկու կառույցների հետ էլ»։
Հարցին, թե Հունաստանի և Ռուսաստանի միջև հարաբերությունների և համագործակցության լուրջ ամրապնդման հնարավորություններ կա՞ն, խոսնակը պատասխանել է. «Իհարկե, այո»։ «Մենք ձգտում ենք և պատրաստ ենք Հունաստանի հետ հաստատել այնքան զարգացած հարաբերություններ, որքան Հունաստանը պատրաստ է դա անել»,- ասել է Պեսկովը։ Նա բերել է Թուրքիայի օրինակը, որը, «չնայած ՆԱՏՕ-ին անդամակցելուն, ռազմատեխնիկական համագործակցության շատ բարձր մակարդակ ունի» Ռուսաստանի Դաշնության հետ։ «Մենք նրա հետ փոխադարձ երկկողմ նախագծեր ենք ծրագրում, քանի որ նրանք բավական ինքնիշխան են որոշումներ կայացնելու համար, չնայած ՆԱՏՕ-ին անդամակցելուն, քանի որ դա համապատասխանում է նրանց ազգային շահերին»,- պարզաբանել է Պեսկովը։