Փաշինյանի հրաժարականը պահանջող ուժը ՔՊ-ի պարտությունը վերածեց հաղթանակի

Վերլուծական 17 Դեկտեմբեր, 2021 23:09

Թալինում հետընտրական իրավիճակը շարունակում է թեժ մնալ: Հիշեցնենք, որ Թալին համայնքի ղեկավարի պաշտոնի համար պայքարում էին քաղաքական չորս ուժեր՝ «Քաղաքացիական պայմանագիրը»-ը, «Զարթոնք» ազգային քրիստոնեական կուսակցությունը, «Հայք» լիբերալ կուսակցությունը, «Մեր համայնքը» կուսակցությունների դաշինքը, սակայն ՏԻՄ ընտրություններում ձայների մեծամասնությունը՝ 46,6 տոկոսը, բաժին հասավ ՔՊ-ին: «Զարթոնք»-ին ընտրել են 2 հազար 882 քաղաքացի (26,1 %), «Հայք» լիբերալ կուսակցությունը ստացել է 1 624 քվե (14,7 %): «Մեր համայնքը» կուսակցությունների դաշինքին իր ձայնն է տվել 1 258 ընտրող (11, 4 %): Ընտրություններին մասնակցած այս երեք ուժերը կոալիցիա են կազմել եւ մտադիր էին իրենց կազմից ընտրել համայնքի ղեկավար: Ավելի ուշ տեղեկություն տարածվեց, որ «Հայք»-ը լարվածությունը թոթափելու համար որոշում է կայացրել հրաժարվել մանդատներից, սակայն, մանդատները վայր չդերցին եւ բավական չէ, որ մասնակցեցին նիստին, դեռ մի բան էլ հենց այս կուսակցության անդամի ձայնի շնորհիվ Տավրոս Սափեյանը դարձավ համայնքապետ: Ընդդիմադիր երեք կուսակցությունները քաղաքապետի պաշտոնում առաջադրել էին «Հայք» կուսակցությունից Դավիթ Մանուկյանի թեկնածությունը: Տավրոս Սափեյանը ստացավ 11 կողմ ձայն, Դավիթ Մանուկյանը՝ 10 կողմ ձայն: «Հայք» կուսակցության ցուցակը գլխավորող Կարեն Գրիգորյանը քվեարկեց ՔՊ-ի թեկնածու Տավրոս Սափեյանի օգտին, եւ նա մեկ ձայնի տարբերությամբ ընտրվեց Թալինի համայնքապետ:

Իսկ հիմա ամենաուշագրավը՝ «Հայք» կուսակցության ղեկավար Արտյոմ Խաչիկյանը 44-օրյա պետարազմից հետո հանդես էր գալիս Նիկոլ Փաշինյանի հրաժարականի կոչով: Երեկ կուսակցությունը հայտարարություն էր տարածել` նշելով, որ անընդունելի են համարում նաև ՀՀ Վարչապետի կողմից արտախորհրդարանական իր կողմից ԸՆՏՐՈՎԻ ուժերի (կուսակցությունների) հետ հանդիպումը, և պահանջում են հանդիպում 1990-ականներից ձևավորված ու մշտապես ակտիվ ներքոստորագրող կուսակցությունների ներկայացուցիչների հետ; Հայտարարության տակ ստորագրել էր «Հայք» կուսակցության ղեկավարը:

Այնուհետև՝ 7 կուսակցություններ համատեղ հայտարարություն տարածեցին, նշելով, որ ՀՀ կառավարությունը սահմանադրորեն իրեն վերապահված պարտականությունները չկատարելու իր կեցվածքով ինքն իրեն դնում է հրաժարական տվածի կարգավիճակում: Եվ կրկին ստորագրողների թվում էր «Հայք» կուսակցության ղեկավարը:

Բացի այդ հայտարարության տեքստում ասվում էր, որ Նիկոլ Փաշինյանը պետք է հեռանա վարչապետի պաշտոնից, որպեսզի զերծ լինի պետական, վարչական ուժերն ու կառույցներն իր վերարտադրությանը ծառայեցնելու որևէ հնարավորությունից՝ հակառակ դեպքում իր գործողությունները կորակվեն որպես իշխանազավթում։

Ավելին` ի թիվս այլ կուսակցությունների` «Հայքը» հանցագործության մասին հաղորդում էր տալիս գլխավոր դատախազին` հայտարարելով, որ իր լիազորությունները վերազանցելու և ՀՀ Սահմանադրական կարգը խախտելու համար Նիկոլ Փաշինյանին պետք է ենթարկել պատասխանատվության ՀՀ քրեական Օրենսգրքի համապատասխան հոդվածներով։

Ստացվում է` ընդամենը ամիսներ առաջ Նիկոլ Փաշինյանին պետական դավաճանության մեջ մեղադրող, նրա դեմ հանցագործության մասին հաղորդում տված քաղաքական ուժի ներկայացուցիչը այսօր իր քվեով նպաստել է Նիկոլ Փաշինյանի դե յուրե և դե ֆակտո ընտրություններում պարտված թիմակցի՝ համայնքապետ դառնալուն: Ակզբունքայնությո՞ւն՝ չէ, չենք լսել...