Ոստիկանները իրականացնում են ՏԻՄ իշխանության ապօրինի զավթում. Փարաքարում իրավիճակը լարված է
ՀասարակությունԻնչպես հայտնեցինք քիչ առաջ, ոստիկանները պատ էին կազմել Փարաքարի համայնքապետի դիմաց՝ թույլ չտալով Վոլոդյա Գրիգորյանին մուտք գործել կառույց: Ոստիկանների հետ երկար բանակցություններից հետո նրանց չհաջողվեց մուտք գործել համայնքապետարան և որոշեցին երթ անել Փարաքարում՝ պայմանով, որ քիչ ուշ նորից կփորձեն մտնել համայնքապետարան:
«Փարաքար համայնքի «Ապրելու երկիր» կուսակցության ավագանու անդամների, համայնքապետ Վոլոդյա Գրիգորյանի և ժողովրդի հետ իրականացնում ենք երթ՝ ոստիկաններին տալով ժամանակ արագ հասկանալու, որ իրենք իարականացնում են ՏԻՄ իշխանության ապօրինի զավթում՝ թույլ չտալով ընտրված համայնքապետին և ավագանու անդամներին մտնել համայնքապետարան: Որևէ մեկը չի կարող սահմանափակել ավագանու անդամների և համայնքապետի մուտքը շենք՝ չունենալով իրավական որևէ հիմք»,- նշեց «Ապրելու երկիր» կուսակցության համահիմնադիր Մանե Թանդիլյան:
Հիշեցնենք, որ արդեն քանի օր է, ինչ Փարաքարում լարված իրավիճակ է: Բանն այն է, որ դեկտեմբերի 20-ին տեղի ունեցած ավագանու անդրանիկ նիստից հետո «Դավիթ Մինասյան» դաշինքի համայնքապետի թեկնածու Դավիթ Մինասյանը և «Ապրելու երկիր» կուսակցության թեկնածու Վոլոդյա Գրիգորյանը ֆեյսբուքյան իրենց էջերում հայտարարել էին, որ ընտրվել են համայնքի ղեկավարներ:
«Ապրելու երկիր» կուսակցությունը 21 հոգանոց ավագանիում ստացել է 10 մանդատ եւ 10 ձայնով իրենց թեկնածուն՝ Վոլոդյա Գրիգորյանը ընտրվել է համայնքի ղեկավար: Թեեւ 10 ձայնը 50 տոկոսից քիչ է, սակայն «Ապրելու երկիր» կուսակցությունը պնդում է, որ եթե առաջադրված է մեկ թեկնածու, ապա նա կարող է ընտրվել 40+ տոկոս ձայներով: Դրանից հետո եկել ավագանու 11 ձայներով համայնքապետ էր ընտրվել Դավիթ Մինասյանը, որը «Դավիթ Մինասյան» դաշինքի թեկնածուն է: Նրան էին ընտրել նաեւ ՔՊ-ի անդամները: