Ընդդիմությունը մեզ մեղադրում էր` Եռաբլուրի պղծում է` լինել դահլիճում, որտեղ այս պարտության կերտողն է. Զոհրաբյան
Տեսանյութեր«Պատերազմից հետո մենք դեռ մի քանի ամիս խորհրդարանում էինք ու այսօրվա ընդդիմությունն օբյեկտիվորեն մեզ մեղադրում էր, որ Եռաբլուրի պղծում է լինել դահլիճում մի տեղ, որտեղ պարտության կերտողն է, զոհերի պատասխանատուն է։ Ես օբյեկտիվորեն ընդունում էի իրենց մեղադրանքը». Այս մասին այսօր՝ դեկտեմբերի 24-ին, «2022 թ.՝ Հայաստան. լինել, թե չլինել» թեմայով քննարկման ժամանակ ասաց ԱԺ նախկին պատգմավոր Նաիրա Զոհրաբյան:
Զոհրաբյանը հավելեց, որ իշխանությունից որևէ ակնկալիք չունի, ակնկալիք ունի միայն ընդդիմությունից, դրա համար է խոսում ընդդիմության մասին.
«Ցինիզմը հասել է այն աստիճանի, որ իշխանություններն ասում են՝ «այո, մենք դավաճան ենք, ինչ ասում եք, ճիշտ է, մենք հանձնել ենք Շուշին, բայց հունիսի 20-ին հասարակությունը մեզ տվեց վստահության քվե՝ իմանալով այդ ամեն ինչի մասին»»,- ասաց Զոհրաբյանը:
«Այստեղ է, որ հասկանում ես՝ միգուցե ընդդիմության ամենամեծ սխալը խորհրդարանական արտահերթ ընտրություններին համաձայնելն էր։ Այն ժամանակ ես կողմ էի արտահերթ ընտրությունների գնալուն, քանի որ ամենակաշմարային երազում անգամ չէի կարող պատկերացնել, որ հանրությունը կգնա ու պատերազմը տանուլ տված, Ալիևի առջև ծնկի եկած քաղաքական ուժին կվերարտադրի։ Ես ասում էի, որ պետք է գնալ ընտրությունների, որպեսզի նաև մեզանից արմատական ուժեր լինեն խորհրդարանում»,-ընդգծեց Զոհրաբյանը:
«Այսօր Հայաստանը լիկվիդացիոն գներով հանված է գեոպոլիտիկ աճուրդի։ Ճնշում միշտ է եղել, սակայն Հայաստանն ընտրելու հնարավորություն է ունեցել, իսկ այսօր զրկել են անգամ մենյուից, ասում են, որ մենք ոչինչ ենք, մեր փոխարեն որոշումը կկայացնեն, մենյուից կհանեն լափն ու կտան, որ ուտենք։ Հայաստանը դադարել է դառնալ սուբյեկտ, մեր մասին կայացնում են որոշումներ ու հետո այդ մասին տեղեկացնում մեզ»,- եզրափակեց Զոհրաբյանը: