Բրիտանացի ամենավտանգավոր մոլագարն իր կյանքի մնացած մասը կանցկացնի գետնի տակ գտնվող ապակե խցում

Անգլիայի դատարանը մերժել է բանտարկյալ Ռոբերտ Մոդսլիի՝ նույն ինքը՝ «Հանիբալ-կանիբալ»-ի դիմումը՝ մենախցից սովորական բանտախուց տեղափոխվելու վերաբերյալ։ Այժմ, ինչպես գրում է Daily Star-ը, Մոդսլին, ով Բրիտանական կղզիների ամենավտանգավոր հանցագործներից մեկի համբավն ունի, ցմահ ազատազրկման մնացած մասը կկրի գետնի տակ գտնվող ապակե մեկուսարանում։

Աշխատելով որպես մարմնավաճառ՝ Մոդսլին 1974 թվականին սպանել է անգլիացի Ջոն Ֆարելին, որից հետո ինքնակամ հանձնվել է ոստիկանություն՝ ասելով, որ հոգեբուժական օգնության կարիք ունի։ Նրան տեղավորել են հոգեկան հիվանդ հանցագործների կլինիկայում, քանի որ փորձաքննությունը հաստատել էր նրա հիվանդությունը, իսկ մինչ այդ նա մեկ անգամ չէ, որ ստացել էր հոգեբույժների օգնությունը` թմրամոլության և ինքնասպանության բազմաթիվ փորձերի պատճառով։ Հիվանդանոցում, ժամեր տեւած խոշտանգումներից հետո, նա սպանել էր մանկապղծության համար դատապարտված մեկ այլ հոգեկան հիվանդ հանցագործի։ Դրանից հետո նա դատապարտվել էր ցմահ ազատազրկման, որը պետք է կրեր Ուեյքֆիլդի բանտում։ Այնտեղ նա սպանել էր ևս երկու մարդու։

Դրա պատճառով 1983 թվականին Մոդսլին չափազանց վտանգավոր է համարվել այլ հանցագործների համար, ինչի կապակցությամբ նրան հատուկ ստորգետնյա խցիկ են հատկացրել։ Այնտեղ նա անցկացնում է օրական 23 ժամ: Ապակե խցում նա ունի ստվարաթղթից պատրաստված սեղան և աթոռ, երկաթբետոնե մահճակալ, ինչպես նաև զուգարան և լվացարան՝ պինդ ամրացված հատակին: Օրվա մեջ մեկ ժամ տրամադրվում է նրա զբոսանքին, որի ժամանակ նրան պետք է ուղեկցեն առնվազն չորս սպա։ Նրան թույլ չեն տալիս նաև շփվել այլ բանտարկյալների հետ։