«Շուշին ու Հադրութը հանձնվել են՝ առանց որևէ մարտի․ Փաշինյանը խրախուսել է պատերազմի դաշտից փախուստը
Տեսանյութեր«Հիմնական հանցագործը, յուրաքանչյուրիս համար, թուրքն է, ադրբեջանցին, բայց բանակցային գործընթացի ձախողման, պատերազմի հրահրման գործում իր դերակատարումն են ունեցել ՀՀ իշխանությունները,այլ հարց է՝ անգիտակցաբար, թե բանակցային գործընթացին չտիրապետելու հետեւանքով». Այս մասին այսօր՝ մարտի 3-ին, Ազգային ժողովում ասաց «Հայաստան» դաշինքի ղեկավար Սեյրան Օհանյանը։
Մասնավորապես՝ նա հիշեցրել է Փաշինյանի հայտարարությունը, թե «Արցախը Հայաստան է ու վերջ», ապա «Չեմ կարող բանակցել Արցախի փոխարեն» ու դրանից հետո ստորագրել Արցախի փոխարեն։
«Սրանք անընդունելի քայլեր են, ինչից օգտվել են հակառակորդները ու հարձակվողական գործունեություն, սադրանքներ իրականացրել։ Ուզում եք նեղացեք, ուզում եք՝ ոչ»,- շեշտել է Օհանյանը։
ՀՀ պաշտպանության նախկին նախարարի արձանագրմամբ՝ բանակցային գործընթացում մշակված փաստաթղթերում առաջնահերթը երբեք չի եղել տարածքների հանձնումը, այլ՝ Արցախի ինքնիշխանությունը՝ իր պատմական տարածքում։
Անդրադառնալով պատերազմին՝ նա նշել է, որ առանց մարտերի հանձնվել է Շուշին, Հադրութը։
«Այստեղ կա՞ այլ տեսակետ, որ դրանք հանձնել են ու հանձնվել է ձեր իշխանության ժամանակ։ Առավել եւս, երբ երկրի ներսում չի մոբիլիզացվել ամբողջ ներուժը՝ ոչ միայն մարդկային ներուժը, այլ նաեւ ինժեներատեխնիկական, շինարարական՝ խորքում պաշտպանությունը կազմակերպելու համար»,- հայտարարել է գեներալն ու հատուկ ուշադրություն հրավիրել, որ դատաիրավական համակարգի կողմից մատը մատին չի խփվել ՝ համատարած անօրինականության, կարգ ու կանոնի բացակայության, խուճապի դեմ խիստ միջոցներ ձեռնարկելու համար։ Ավելին, ինչպես նշեց Ս.Օհանյանը, այդ ամենը խրախուսվել է այսօրվա իշխանության ղեկավարի կողմից՝ կոչումներ բաժանելով։