Կառավարությունը ավելի քան 750 միլիոն դրամ կտրամադրի Երևանում բռնցքամարտի Եվրոպայի առաջնության կազմակերպման համար

Կառավարությունը 750 միլիոն 192 հազար դրամ գումար կհատկացնի «Ֆակտորի Փրոդաքշն» ընկերությանը 2022 թվականի մայիսի 21-31-ը Երևանում անցկացվելիք բռնցքամարտի մեծահասակների Եվրոպայի առաջնության կազմակերպման և  անցկացման համար։ Կառավարության որոշման նախագիծը ներկայացրեց Կրթության, գիտության, մշակույթի և սպորտի նախարար Վահրամ Դումանյանը։

«Բռնցքամարտի ռինգերի, տանձիկների և ձեռնոցների ձեռքբերման, տեղափոխման և մաքսազերծման, առաջնության հյուրընկալման անդամավճարի և հաշվողական համակարգի տեղափոխման ու սպասարկման համար 2022 թվականի փետրվարի 17-ին Կառավարության համապատասխան որոշմամբ Հայաստանի Հանրապետության բռնցքամարտի ֆեդերացիային է հատկացվել 77 միլիոն 768 հազար դրամ։ Տեղեկացնեմ, որ նշված գույքը ձեռք է բերվել, և դրանց մի մասը արդեն գտնվում է Լարսի անցակետում։ Ներկայացվող նախագծով առաջարկվում է Երևանում անցկացվելիք բռնցքամարտի մեծահասակների Եվրոպայի առաջնության կազմակերպման և  անցկացման  նպատակով «Ֆակտորի Փրոդաքշն» ՍՊԸ-ին կառավարության պահուստային ֆոնդից հատկացնել 750 միլիոն 192 հազար դրամ գումար, որը հիմնականում կուղղվի մրցաշարի շրջանակներում բրենդավորման և այլ անհրաժեշտ ծախսերի իրականացման, գովազդային և տպագրական և սոցիալական ցանցերում առաջխաղացման, բացման հանդիսավոր արարողության և մրցաշարի ընթացքում միջոցառումների կազմակերպման ծառայությունների ձեռքբերմանը»,- ասաց Դումանյանը։

Նախարարի խոսքով՝ առաջնության նախապատրաստման և անցկացման համար ժամանակի սղության պատճառով, ինչպես նաև հաշվի առնելով տարվող աշխատանքների ծավալը, որոշում է կայացվել գումարը տրամադրել ուղիղ դրամաշնորհի տեսքով, որը հնարավորություն կտա ժամանակին և առանց խոչընդոտների կազմակերպել և իրականացնել միջոցառումը։

«Համադրելով գին-որակ-ներկայանալիություն-փորձ հարաբերակցությունը՝ միջոցառման իրականացնող  ընտրվել   է «Ֆակտորի Փրոդաքշն» ՍՊԸ-ն։ Իհարկե, առաջիկայում Կառավարության քննարկմանը կներկայացվի նաև գումարի հատկացման մասին Կառավարության որոշման ևս մեկ նախագիծ կազմակերպչական այլ ծախսերի մասով, մասնավորապես՝ պատվիրակության կացության, կորոնավիրուսի թեստերի, ավիատոմսերի, տրանսպորտային ծառայությունների, պաշտոնական ընթրիքի, ինչպես նաև որոշ հիմնական միջոցների ձեռքբերման համար»,- հավելեց Դումանյանը։

Նախարարը հիշեցրեց, որ առաջնության ընթացքում ակնկալվում է շուրջ 40 երկրներից 400 անձանց մասնակցություն՝ 280 մարզիկ և նրանց ուղեկցող անձնակազմ և պատվիրակներ։

«Առաջնության անցկացումը կարևոր տեղ ունի մարզաձևի զարգացման և մասսայականացման գործում, ինչի արդյունքում Հայաստանի Հանրապետությունն իր պատվավոր տեղը կունենա աշխարհի սպորտային քարտեզում։ Մայիսի 29-ից 31-ը Երևանում կայանալիք Եվրոպայի բռնցքամարտի առաջնությունն իր ծավալով ու նշանակությամբ աննախադեպ է Հայաստանի Հանրապետությունում երբևէ կազմակերպված սպորտային միջոցառումների շարքում։ Նույնիսկ խորհրդային տարիներին մեր երկրում նման մակարդակի սպորտային միջոցառում չի կազմակերպվել»,- եզրափակեց Դումանյանը։

Այս թեմայով Արտակարգ դեպք՝ Երևանում․ հաստաբուն ծառը կոտրվել և ընկել է ավտոմեքենաների վրա Ավետիք Չալաբյանը 1 մլն դրամ է փոխանցել Սամվել Վարդանյանի գրավի համար Porsche-ն ներկայացրել է ավելի քան 15 000 դոլար արժողությամբ էլեկտրական հեծանիվ (լուսանկարներ) Բացահայտվել է ընդհանուր ավելի քան 13 կգ «Հերոին», «Մեթամֆետամին» և «Մարիխուանա» տեսակի թմրամիջոցների մաքսանենգության դեպք Սամվելի դեպքը այլանդակության գագաթնակետն է, աղմուկը շատ էր, դրա համար կալանք չկիրառվեց Կստեղծվի ավելի քան 800 նոր աշխատատեղ ԼՂ-ից բռնի տեղահանված ուսուցիչների համար նախատեսված հատկացումները կբաշխվեն ըստ մարզերի Այսօրվանից մեկնարկում է բռնցքամարտի Եվրոպայի առաջնությունը Ձյուդոյի Եվրոպայի առաջնությանը Հայաստանը կմասնակցի 3 մարզիկով Արթուր Վանեցյանը 1 մլն դրամ է փոխանցել Սամվել Վարդանյանի գրավի համար