Հայաստանում չպետք է լինի այնպիսի իշխանություն, որը սեփական ժողովրդին ահաբեկում է՝ ի շահ թշնամիների․ Վահե Հակոբյան
ՔաղաքականԵրկու օր առաջ մենք միասին տոնեցինք մեր պապերի 77 տարի առաջ կերտած հաղթանակը, որում հայ ազգն ունի շատ մեծ նվաճում․ 300 000 հայորդի մասնակցել է այդ պատերազմին, որի կեսից ավելին չի վերադարձել տուն, հայ ազգը տվել է 6 մարշալ, 60 գեներալ և 103 ԽՍՀՄ հերոս, բայց մեր պապերը Ստալինգրադում և Կուրսկում կռվելիս պահում էին մեր՝ այստեղ լինել-չլինելու, մեր գոյության հարցը, որովհետև Թուրքիան մինչև վերջին վայրկյանն ուզում էր բացել երկրորդ ճակատը, որպեսզի աջակցեր ֆաշիստական Գերմանիային, այս մասին Երևանի Ֆրանսիայի հրապարակում ընթացող հանրահավաքի ժամանակ ասաց ԱԺ «Հայաստան» խմբակցության պատգամավոր Վահե Հակոբյանը։
Պատգամավորը նշեց, որ այդ իրադարձություններից տասնյակ տարի անց էլ ոչ մի բան չի փոխվել Անկարայի հավակնություններում և վարած քաղաքականությունում և հաշվի առնելով այն սպառնալիքները, որոնք մինչև այսօր գալիս են Թուրքիայի, նաև Ադրբեջանի կողմից, նորաստեղծ, նորանկախ Հայաստանում 1997 թվականին Ռուսաստանի Դաշնության հետ կնքվեց ռազմաքաղաքական համագործակցության պայմանագիր, որը գործում է մինչև հիմա։
«Եվ հիմա թե՛ Թուրքիայի ու Ադրբեջանի կողմից, թե՛ մեր իշխանությունների կողմից այն սպառնալիքները, թե եթե մենք չզիջենք, այս մի բանն էլ չտանք, պատերազմ կլինի, հիմա հարց եմ ուզում եմ տալ՝ ի՞նչն է փոխվել․ պայմանագիրը, միջազգային երաշխիքները չեղյա՞լ են հայտարարվել, Ռուսաստանի Դաշնությունը միակողմանի դո՞ւրս է եկել այդ պայմանագրից։ Իսկ հնարավո՞ր է, որ մեր կողմն է փորձում դուրս գալ։ Հնարավոր է, չի բացառվում։ Դա ևս մեկ պատճառ, որպեսզի սրանք հեռանան, սեպեր չխրեն մեր ու մեր դաշնակցի միջև»,- ասաց Վահե Հակոբյանը։
«Ժողովուրդ ջան, մենք շատ բան ենք տեսել պատմության ընթացքում, բայց երբ սեփական իշխանությունը ահաբեկում է սեփական ժողովրդին ի շահ մեր թշնամիների, սա պարզապես որևէ տրամաբանությամբ չի կարելի հասկանալ ու ընկալել։ Հասկանում եք չէ՞ ուր ենք մենք հասել։ Մեկուկես տարի է անցել պատերազմից, սակայն մեր բանակը շարունակում է քանդվել, մեր բանակը նույնպես մեր անվտանգության երաշխիքն է, որը պետք է լինի ուժեղ և հզոր՝ և՛ Հայաստանի, և՛ Արցախի բանակը։ Մենք այսօր մեծ պատասխանատվություն ենք կրում մեր սերունդների առջև, որպեսզի իրենք մեր սխալների վրա սովորեն, որ թույլ չտան ամեն մի թյուրիմացության գա ու վերցնի իշխանությունը ու երկիրը հասցնի այս վիճակի, դրա համար մեր պայքարը պետք է տարվի մինչև վերջ, անկասելի է մեր պայքարը։ Մեր պայքարը պետք է բերենք տրամաբանական ավարտի, իսկ դա մեկն է՝ առանց Նիկոլ Հայաստան»,– ասաց նա։