«Վաղը ճանապարհներ չենք շրջափակելու»․ Իշխան Սաղաթելյանը ներկայացրեց մայիսի 19-ի ծրագրերը

Political 19 May, 2022 22:14

Ընդդիմադիրները վաղը ճանապարհներ չեն շրջափակի, բայց անելիքներ կլինեն։ Այս մասին Ֆրանսիայի հրապարակում այսօրվա ամփոփիչ հանրահավաքում հայտարարեց «Դիմադրություն» շարժման անդամ, ԱԺ փոխխոսնակ Իշխան Սաղաթելյանը։

«Քաղաքացիներին ժամը 09։30-ին հրավիրում ենք Ֆրանսիայի հրապարակ, տարբեր աշխատանքներ ունենք անելու։ Վաղը ճանապարհներ չենք շրջափակելու, ունենք հատուկ ծրագիր»,- ասաց Սաղաթելյանը՝ հավելելով, որ տարբեր պատճառներից ելնելով՝ այդ ծրագրի դետալներն այս պահին չի հրապարակում։ Սաղաթելյանը շեշտեց, որ վաղը կարևոր վճռական օր է լինելու։

«Լինելու են նաև անհնազանդության ակցիաներ։ Հայաստանում կա միջազգային պատվիրակություն, մեր ձայնը պետք է լսելի դառնա»,- ասաց Իշխան Սաղաթելյանը։

Նա նշեց, որ կազմակերպվելու են այնպիսի միջոցառումներ, որտեղ լսվելու է հենց ժողովրդի ձայնը։

«Մեր ակցիաները կշարունակվեն մինչև ժամը 19։00-ն, իսկ 19։00-ին կրկին հրավիրում ենք հանրահավաքի»,- ասաց Իշխան Սաղաթելյանը։

Անդրադառնալով մայիսի 22-ին ՀՀ վարչապետ Նիկոլ Փաշինյանի՝ Բրյուսել կատարելիք այցին և կայանալիք բանակցություններին` նա ասաց. «Մենք հստակ ասել ենք և արձանագրել, որ Նիկոլը չունի մանդատ՝ ժողովրդի, Հայաստանի Հանրապետության կողմից որևէ բանակցություն վարելու: Դիմում եմ այն անձանց, ում հետ ինքը հանդիպելու է՝ շատ հստակ ասելով, որ Հայաստանի Հանրապետության կողմից ներկայացված այդ 6 առաջարկները հայ ժողովրդի կամքի, շահերի հետ որևէ կապ չունեն։

Հետևաբար, Նիկոլի հետ ձեռք բերված ցանկացած պայմանավորվածություն ոչ լեգիտիմ է և առ ոչինչ»,- ասաց Իշխան Սաղաթելյանը։

Նա տեղեկացրեց նաև՝ նշված այցին և պայքարի դուրս եկած քաղաքացիների և քաղաքական ուժերի տեսակետներին շատ ավելի հանգամանալից անդրադարձ է լինելու մայիսի 21-ին սպասվող հանրահավաքին։