Մրցաշարին Արցախի դրոշ բարձրացնելով լրացուցիչ հարված ենք հասցնում ՀՀ իմիջին․ Արայիկ Հարությունյան
Քաղաքական«Նման միջոցառումներին, նման քաղաքական ժեստերը կարող են բացասաբար հետագա մեր նման հնարավորությունների վրա», -այս մասին Հանրային հեռուստաընկերության եթերում ասել է վարչապետի աշխատակազմի ղեկավար Արայիկ Հարությունյանը՝ անդրադառնալով բռնցքամարտի Եվրոպայի առաջնության բացման արարողության ժամանակ Արցախի դրոշով բեմ բարձրացած երիտասարդներին․
«Աշխարհի և Եվրոպայի առաջնությունները շատ կարևոր են իմիջ բարձրացնելու և շատ ոլորտներ զարգացնելու համար։ Հիմա եթե նման գործողություններով մենք ուզում ենք Հայաստանին վնասել, որովհետև իրականում մենք դրանով օգուտ չենք տալիս Արցախի հարցի լուծմանը, ընդհակառակը` լրացուցիչ հարվածն ենք հասցնում երկրի իմիջին, որը հետագայում խանգարելու է ՀՀ-ում նման միջոցառումներ ընդունելու»,- ասել է նա։
Հարությունյանի կարծիքով` դրոշը պետք է ցուցադրել ճիշտ տեղում, ճիշտ պահին։ Նա նաև համոզմունք հայտնել է, որ այն, ինչ կատարվում է հրապարակում, կամ առավոտյան մի քանի ժամով, որևէ կերպ չի օգնում, այլ վնասում է երկրին:
«Եթե մի հարթակում ասում են, որ Հայաստանն է պատերազմը սկսել ու դու գնում ես ինչ որ դատարան ու ասում ես հարևան պետությունն է էսինչ տարածքում էթնիկ զտումներ իրականացրել, ապա միանգամից ասում են, որ ձեր հրապարակներում ասում են, որ դուք եք պատերազմը սկսել»,- նշել է նա։
Վարչապետի աշխատակազմի ղեկավարի կարծիքով` Ռոբերտ Քոչարյանը և Սերժ Սարգսյանը հմուտ քաղաքական գործիչներ են։ «Հաշվարկել են, որ այլևս ՀՀ քաղաքական դաշտում որևէ շանս չունեն և այս իրավիճակը պետք է օգտագործեն տարբեր մանիպուլյացիաներով ՀՀ-ում լարված իրավիճակ ստեղծելու: Իրենք ամեն ինչ կապկում են, մեր 2018-ի գործողությունները: Կապկելով որևէ տեղ չեք հասնելու»,- նշել է նա։