Ցավալի է, որ կան գործիչներ, ովքեր փորձում են խաթարել ՀՀ-ի և Արցախի պաշտոնյաների համատեղ աշխատանքը. Էդմոն Մարուքյան
ԲլոգոսֆերաՀՀ հատուկ հանձնարարություններով դեսպան Էդմոն Մարուքյանը ֆեյսբուքյան գրառմամբ հերքել է այսօր տարածված տեղեկատվությունն այն մասին, որ Արցախի խորհրդարանական բոլոր ընդդիմադիր խմբակցություններն ու կուսակցությունները հրաժարվել են հանդիպել իր հետ․
«Ցավալի է, որ կան գործիչներ, ովքեր ստի միջոցով փորձում են խաթարել Հայաստանի և Արցախի պետական պաշտոնյաների համատեղ աշխատանքը:
Արցախի խորհրդարանում շուրջ երկու ժամ հանդիպումներ եմ ունեցել, այդ թվում ընդդիմադիր խմբակցությունների պատգամավորների հետ: Քննարկել ենք բարձրացված բոլոր հարցերը, մտահոգություններն ու առաջարկությունները»:
Հիշեցնենք, որ Արցախի ընդդիմադիր՝ «Արդարություն» կուսակցության համանախագահ Հակոբ Հակոբյանը «Փաստինֆո» լրատվականի հետ զրույցում ասել էր․ «Ազգային Ժողովի բոլոր ընդդիմադիր խմբակցություններն ու կուսակցությունները՝ «Արդարություն» խմբակցությունը, Դաշնակցություն և «Ազգային ժողովրդավարություն» կուսակցությունները մերժեցին նրա հետ հանդիպումը»։