Ինչու Փաշինյանը բաց թողեց օֆշորներում «լողացող» խոշոր «ձկներին»

Analytical 28 June, 2022 20:24

Թավշյա հեղափոխությունից հետո շատերը հույս ունեն, որ նոր իշխանությունները հետ կբերեն նախկինների թալանած և նրանց կողմից արտերկիր տեղափոխված հսկայական գումարները։ Ավելին` կառավարությունն էլ հայտարարել է, որ այդ ուղղությամբ ինտենսիվ աշխատում է և որ երկրից թալանված և արտերկրում հանգրվանած ունեցվածքի նույնականացման և վերադարձի գործընթաց սկսելու ակնկալիքով խորհրդատվական և տեխնիկական աջակցություն ստանալու վերաբերյալ նամակ է գրել Համաշխարհային բանկի ղեկավարությանը: Թե այդ նամակին ինչ պատասխան է ստացվել և ստացվե՞լ է արդյոք, թե ոչ՝ չգիտենք: Մեկ տարի առաջ էլ Նիկոլ Փաշինյանը հայտարարեց, որ գնալու են օֆշորների, օֆշորի օֆշորների հետևից և մինչև վերջին լուման հետ են բերելու։ Անցավ մեկ տարի, հիշեցնենք, թե նախկին պաշտոնյաներից ովքեր էին թիրախավորվում օֆշորային սկանդալներում և արդյոք նրանց օֆշորներին կառավարության ձեռքը հասավ։

2019-ի ապրիլի 15-ին ՀՔԾ-ն հայտնեց, որ ՀՀԿ խմբակցության նախկին պատգամավոր, Դատական ակտերի հարկադիր կատարման ծառայության նախկին ղեկավար Միհրան Պողոսյանին մեղադրանք է առաջադրվել օֆշորային սկանդալի գործով, նաև՝ պաշտոնեական դիրքի չարաշահմամբ խոշոր չափերի վատնման համար։ Պողոսյանին մեղադրանք էր առաջադրվում այն ժամանակ, երբ վերջինս արդեն երկրում չէր։

2018-ի հոկտեմբերի 24-ին վարչապետ Նիկոլ Փաշինյանը հայտարարեց, որ բացահայտվել է երրորդ հանրապետությունում կաշառքի ամենախոշոր գործը։ Փաշինյանն առանց անուն հնչեցնելու տեղեկացրեց, որ կաշառք ստացողը պատգամավոր է, արտերկրից սպասում են մի փաստաթղթի, որի ստացումից հետո պատգամավորը կկալանավորվի։ Ըստ մեղադրանքի՝ նախկին պատգամավոր Արամ Հարությունյանը բնապահպանության նախարար աշխատելու տարիներին գործարար Սիլվա Համբարձումյանից պահանջել ու ստացել է 14 միլիոն դոլար՝ հանքերևակումների լիցենզիա տրամադրելու համար։ Այժմ նա հետախուզվում է։

«Հետք» պարբերականի 2013 թվականի հայտնի հրապարակումից հետո, (ըստ որի` գործարար Աշոտ Սուքիասյանը «Հայաստան» հանրախանութի սեփականատեր Փայլակ Հայրապետյանի միջոցները յուրացրել է կիպրոսյան օֆշորային մի ընկերության միջոցով, որի հիմնադիրներից էր նաև Հայաստանի վարչապետ Տիգրան Սարգսյանը), վարչապետը հանդես էր եկել հայտարարությամբ՝ հերքելով, թե որևէ առնչություն ունի այդ ընկերության հետ: Այնուամենայնիվ, Նիկոլ Փաշինյանը ընդդիմադիր պատգամավոր եղած ժամանակ այդ հերքմանը այնքան էլ չէր հավատում, միևնույն ժամանակ հեղափոխությունից հետո գործը այդպես էլ առաջ չգնաց։

Լրատվամիջոցների տեղեկությունների համաձայն՝ Սերժ Սարգսյանի ընտանիքը պատրաստվում էր օֆշորային գոտում գրանցված «Գլոբալ-Կոնտակտ» ընկերության միջոցով ձեռք բերել Որոտանի հէկը: Իհարկե, շրջանառվում էր Սաշիկ Սարգսյանի անունը։

Օֆշորային գրանցում ունեցող «Բալկան ՊԵՏ Քոմփանի» ՍՊԸ-ն կապվում է ՀՀԿ-ական նախկին պատգամավոր Աշոտ Արսենյանի որդու` Ջերմուկի ներկայիս քաղաքապետ Վահագն Արսենյանի անվան հետ։

«Դալմա ինվեստ» ՍՊԸ-ում Կարեն Կարապետյանի որդին` Տիգրան Կարապետյանը, 1% բաժնեմաս ունի, իսկ 99% բաժնետոմսերը Բրիտանական Վիրջինյան Կղզիներում գրանցված օֆշորային «Հոլթ Հոլդինգ ընդ. ֆայնենս» ընկերությանն է:

Ինչպես տեսնում ենք՝ օֆշորի հետևից գնացող իշխանությունը վերջին մեկ տարվա ընթացքում այդպես էլ չպարզեց վերը նշված անձանց կապը օֆշորների հետ, չենք խոսում՝ այսպես կոչված թալանված փողերը բյուջե վերադարձնելու մասին...